Ведомствоның мәліметінше, Үржар және Үшарал әуежайларының ұшу-қону жолақтарын жөндеу жұмыстары ұзаққа созылған.
Нысандар туристік маусымға дайын болуы тиіс еді. Алайда мердігерлер жұмысты уақтылы аяқтамағандықтан іске қосу мерзімі ауыстырылды.
Жаңғырту аясында ұшу-қону жолақтары мен жүру жолдарын, перронды қайта жаңарту, жарықтандыру құралдарын орнату, периметрді қоршау және басқа да жұмыстар қарастырылды. Бұл қауіпсіздік пен сапа стандарттарының деңгейін көтеруі тиіс. Бұл жұмысқа Жетісу және Абай аудандарының әкімдіктері жауапты.
Министр Қайырбек Өскенбаев әуежайлардағы құрылыс-монтаж жұмыстарын тез арада аяқтауды тапсырды.
Үшарал — Алматы және Үшарал — Нұр-Сұлтан әуе бағыттары жазғы маусымда әр бағыт бойынша аптасына 14 рейс, қалған уақытта 7 рейс жиілігімен орындалатын болады. Билет құны сәйкесінше 15 мың теңге және 16 мың теңге болады.
Сондай-ақ Үшарал — Талдықорған бағыты бойынша жазғы маусымда 28 рейс, қалған кезеңде 14 рейс жиілігімен жолаушы тасымалдайды. Ұшу L-410 ұшағында жүзеге асырылады, билет құны 8 мың теңге.
Үржар — Алматы және Үржар — Нұр-Сұлтан әуе бағыттарында Ан-24 ұшағында жазғы маусымда әр бағыт бойынша аптасына 10 рейс жиілігімен орындалады, қалған уақытта 5 рейс болады. Билет құны сәйкесінше 14 мың теңге және 16 мың теңге.
