«Модульдер 15 күннің ішінде құрылды. Кепілдік мерзімі — 36 ай. Блоктық-модульдік медициналық пункт — ауылдық жерлерде жедел медициналық көмек көрсетуді жүзеге асыратын мекеме. Бұл нысан 12 кабинеттен тұрады: дәріхана пункті және анықтамасы бар вестибюль, медбике, акушерлік қабылдау, емшара, егу, материалдарды алу және зерттеу жүргізу және т.б.», — деп көрсетілген әкімдіктің жауабында.
Мамандардың ақпаратынша, нысан жауын-шашынға, қатты аязға, желге және 9 балға дейінгі жер сілкінісіне төзімді.
«Кербұлақ пен Сарыбұлақ ауылындағы медициналық пункт үшін электр энергиясын беру жекелеген қосалқы трансформаторлық стансалардан жүргізіледі. Ауа райының қолайсыздығына байланысты абаттандыру жұмыстары тоқтап тұр», — делінген хабарламада.
Сондай-ақ мамандар Қосқұдық ауылында су құбырын тарту бойынша жұмыстар аяқталмағанын жеткізді. Олардың ақпаратына сүйенсек, мұндағы қосалқы электр стансасының да қуаты күшейтіледі. Бұл жұмыстар осы айда аяқталады.
«Қазіргі уақытта амбулаторияларды Алматы облысы денсаулық сақтау басқармасының теңгеріміне беру мәселесі қарастырылып жатыр», — деп жазды мамандар.
Бұған дейін ауыл тұрғындарының сапасыз құрылысқа шағымданғанын жазғанбыз.
