«Ардақты аналар! Қымбатты ханымдар мен аяулы арулар! Баршаңызды көктемнің шуақты мерекесі – Халықаралық әйелдер күнімен шын жүректен құттықтаймын! Қашаннан ақыл-парасатымен, сұлу көркімен ер азаматтың сенімді серігі, отбасының берекесі бола білген аруларымыз бен аналарымыз әрдайым мақтаныш етуге лайықты», — деді Марат Сұлтанғазиев құттықтау сөзінде.
Облыс әкімінің айтуынша, жаңадан құрылған Алматы облысында мемлекеттік органдар мен ірі компанияларда басшылық қызмет атқаратын немесе бизнес саласында кәсібін өркендетіп жүрген әйелдер аз емес.
«Мысалы, мемлекеттік қызметте еңбек ететін қыз-келіншектердің үлесі – 53 пайыз, сондай-ақ денсаулық сақтау саласында 68, білім беру саласында 71 және мәдениет саласында 47 пайызды құрайды. Олар аймақтың өсіп-өркендеуі мен тұрақты дамуы жолында өз қолтаңбаларын қалдырып жатыр», — деді әкім.
Сонымен қатар өңір басшысы әйелдерге ақшалай сыйлық табыс етіп, қайта құрылған Аналар кеңесінің баянды бастамаларды жүзеге асырып жатқанын айтты.
Өз кезегінде қабылдауда болған әйелдер қауымы облыс әкіміне алғыстарын жеткізді.
