Оқиға 24 ақпанда болған. Балалардың анасы мұғалім болып қызмет атқарған. Ол 110 шақырым жердегі аудан орталығы Шонжыға жиналысқа кеткен. Отағасы 39 жастағы азамат балабақшадан 3 жасар баласын алып келеді, ал бастауышта оқитын 7 жастағы ұлы сабақтан өзі келген. Ер адам газға сүт қойып, сол күйі ұйықтап кеткен. Есікті іштен жауып алған. Көршілерінің болжамынша, балалар сыртқа шығып кетпесін деген болуы мүмкін.
Үйден өрт шығып жатқанын байқаған көршілері құтқармақ болып тұра ұмтылғанымен есікті аша алмаған. Шағын терезені сындырғанымен ішке кіре алмайды. Өйткені бұл уақытта үйдің төбесіне дейін жанып кеткен. Баспананың жалпы ауданы — 40 шаршы метр, шағын ғана екі ауызды болған. Өкінішке орай, балалар мен әкелерін тілсіз жаудан құтқару мүмкін болмады.
Ауыл тұрғындары ұялы байланыс болғанда марқұмдарды ажалдың аузынан алып қалар ма едік, деп күйінеді. Өйткені олар құтқарушыларға телефон шала алмаған. Екі баланың денесін үй ішіндегі терезе алдынан тапқан. Балалар құшақтасқан күйі көз жұмған.
Облыс әкімдігінің айтуынша, Кепебұлақ ауылында Тele2/Аltel және Beeline байланыс операторларының 2G стандартындағы байланысы ғана бар.
«Ауылдың орналасқан жер бедерінің ерекшелігіне байланысты байланыс тұрақты емес. Ауыл мектебіне талшықты-оптикалық байланыс орнатылған жағдайда тұрғындарды радиокөпір технологиясы арқылы интернетке қосуға болады. Жоғары жылдамдықты интернетті қосу үшін осы жылы қайтадан қаражат бөлініп, конкурс жарияланады», — деді облыстық әкімдіктің баспасөз қызметі.
Кепебұлақ ауылын интернетпен қамту қазіргі уақытта әзірленіп жатқан 2023-2027 жылдарға арналған «Қолжетімді интернет» ұлттық жобасы аясындағы іс-шаралар жоспарына қосылды.
Баспасөз қызметінің айтуынша, Цифрлық даму министрлігі, Алматы облысының әкімдігі және байланыс операторлары аталған мәселені толық бақылауда ұстап отыр.
Посмотреть эту публикацию в Instagram
