Өңір басшысының айтуынша, Балқаш ауданы өңдеу өнеркәсібі облыстағы 9 аудан бойынша ең соңғы орында тұр.
«Балқаш ауданының облыс өнеркәсібіндегі үлесі небәрі 0,2%-ды құрайды және он ауданның ішінде 9-орында», — деді Марат Сұлтанғазиев.
Ол аталған мәселені шешу үшін өзінің орынбасары Арслан Дәндібаевқа, тиісті басқармаларға аудан әкімімен бірлесіп биыл ет және сүт өңдеу бойынша бір-екі кәсіпорынды іске қосуды қамтамасыз етіп, мал шаруашылығы өнімінің өнімділігі мен сапасын арттыру шараларын қабылдауды тапсырды.
Облыс әкімінің тоқталған екінші мәселесі — ауданда «Ауыл аманаты» бағдарламасының іске асырылуы.
«Айта кететін нәрсе, Мемлекет басшысының бастамасымен елімізде «Ауыл аманаты» жобасы іске асырыла бастады, оның басты мақсаты — ауылдық жерлердегі халықтың табыс деңгейін арттыру. Жобаны іске асыру үшін 2023-2025 жылдарға республикалық бюджеттен қосымша қаражат қарастырылып жатыр. Балқаш ауданынан небәрі 257 өтінім берілді», — деді Марат Сұлтанғазиев.
Өңір басшысының мәліметінше, аудандағы бір ауылда 300 үй бар, оның 25-і ғана осы бағдарлама бойынша ұсыныс білдірген. Қалған 275 үй тұрғындары да мал шаруашылығымен айналысады. Мұндай төмен көрсеткіштің себебі — әкімдік тарапынан түсіндірме жұмыстарының дұрыс жүргізілмеуінде.
«Бұл бағдарлама ауыл тұрғындарына өз бизнесін дамытуға немесе кооператив құрамында 2,5% мөлшерлеме бойынша жеңілдетілген несие алуға мүмкіндік береді, сонымен қатар техниканы да лизингке алуға болады. Ауыл шаруашылығы басқармасы, аудан әкімі несиелендіру үшін жобаларды мұқият таңдап, өзін-өзі жұмыспен қамтығандар мен жұмыссыз азаматтарды мүмкіндігінше қамту қажет», — деді облыс әкімі.
