Қазақстандағы ірі мұнай кеніштерінің бірі «Теңіз» кен орнында 6 шілде күні жарылыс болып, екі жұмысшы қаза болды, үш адам ауруханаға түскен. Сынақтарды жүргізген мердігер өз жұмысын уақытша тоқтатып, 4 мыңға жуық жұмысшы демалысқа жіберілді.
Жантүршігерлік оқиға «Сенімді құрылыс» ЖШС жұмысшылары ауысымының аяқталуына екі күн қалғанда болған. Бұл туралы өндірістік байланыс менеджері Гүлмира Бапанова баяндады.
«Оқиғадан кейін жұмыс жартылай тоқтатылды, бұл күндері еңбекақы төленеді, жұмысшылар үйіне жіберілді. Оқиғаның себебін анықтау үшін арнайы комиссия құрылды. Мұндай оқиға бірінші рет болып отыр. Компания қауіпсіздік ережелеріне үлкен мән береді», — дейді Гүлмира Бапанова.
«Қазір зардап шеккендердің бірі облыстық аурухананың жансақтау бөлімінде жатыр. Оған шұғыл ота жасалды. Құрманғазы ауданының 1996 жылғы тұрғынының ішкі органдары жарылыстан зақымданған, сондай-ақ омыртқасы мен бірнеше қабырғасы сынған. Оның жағдайы өте ауыр», — деді облыстық Денсаулық сақтау басқармасының басшысы Асхан Байдувалиев.
Айтуынша, 1998 жылы туған екінші зардап шегушіге алғашқы психологиялық көмек көрсетілді. Жылыой аудандық ауруханасына жеткізілген үшінші зардап шегуші қолхат бойынша үйіне шығарылды.
