Ауыл тұрғыны Мира Молдыбаева үйіне су кіретін жолды мүмкіндігінше жауып тастап жатыр.
«Тас, қоқыс, топырақ, қап барлығын қолданып жатырмыз. Септик аузына дейін толған. Су үйге кірейін деп тұр. Шаршадым», — деді ол.
Қазір өңірде балалар мектеп пен балабақшаға бара алмай отыр. Ал үлкендер болса ауыз су іздеп әлек. Жаңадан салынып жатқан ғимараттарда су мүлдем жоқ.
«Су жоқ. Барлығы аулада құдық қазып жатыр, бірақ ол қазір қатып қалды. Сондықтан көршілерден су іздеп құтыларымызбен осылай жүреміз», — деді тұрғын Зәуреш Төбішева.
Тұрғындар бірнеше жылдан бері ауылдың мәселесін шешуді сұрап жергілікті атқамінерлерге жүгінген. Өз кезегінде ауыл әкімдігі тұрғындардың өтініш-тілектерінің назардан тыс қалмайтынын жеткізген.
«Бұл жағдай қазір барлық жаңадан салынып жатқан ғимараттарда байқалады. Қар еріп, су үйлерге қарай ағып жатыр. Қазір арықтарды тазалап, суды кері бағытта төмен түсіріп жатырмыз. Көшеде 10 техника және 50 адам жұмыс істеп жатыр», — деді Ұзынағаш ауылдық округі әкімдігінің төтенше жағдайлар жөніндегі бас маманы Нұрбол Мырзабаев.
Билік тұрғын үйлерді су баспайтынына уәде беріп отыр. Ал ауыз суды тартуға қаржы биыл бөлінетінін айтты.
