Облыстық жолаушылар көлігі және автомобиль жолдары басқармасының хабарлауынша, мобильді топ Алматы облысының Қарасай және Іле аудандарын аралап шықты.
Бұл аудандар жаяу жүргіншілердің қатысуымен болған жол апаттарының статистикасы негізінде, сондай-ақ аталған аумақта жол ережелерін бұзу туралы деректердің көп болуына байланысты таңдап алынды.
Сонымен қатар Алматы облысының прокуратурасы мен Алматы көлік прокуратурасы көліктік бақылау инспекциясымен, облыстық полиция департаментімен бірлесіп «Жол қозғалысы қауіпсіздігі» жобасын іске асыру аясында өткен демалыс күндері «Алматы-Өскемен» тас жолында артық жүгі бар жүк көліктерін анықтау бойынша бірлескен рейд жүргізді.
Рейд барысында 30-40% артық жүктемесі бар үш автокөлік анықталды.
Кінәлі заңды тұлғалар 571-баптың 6-бөлігі (ауыр салмақты автокөлік құралдарының салмақ параметрлерінен асып кетуі, оның ішінде арнайы автоматтандырылған өлшеу құралдарын пайдалана отырып, сол сияқты арнайы рұқсатсыз тіркелуі), 571-1-баптың 1-бөлігі (тасымалдаушының тауар-көлік жүкқұжатын ұсынбауы), 571-баптың 9-бөлігі (жүк жөнелтушінің автокөлік құралын тиеу процесінде Қазақстан заңнамасында белгіленген рұқсат етілген салмақ параметрлерін бір тоннадан және (немесе) габариттік параметрлерден асыруы) бойынша әкімшілік жауаптылыққа тартылып, оларға миллион теңгеден астам сомаға айыппұл салынды.
Облыстық прокуратура тұрғындардың «Жол қозғалысы қауіпсіздігі» жобасына қатыса алатынын еске салады.
Ол үшін жол белгілерінің, жарықтандырудың, бағдаршамдардың болмауы, қарды уақтылы жинамау, сапасыз құрылыс, автожолдарға қызмет көрсету және жөндеу, жолда малдың болуы туралы фото және бейне материалдарды телеграм арнаға жіберу қажет (+7-777-012-35-91).
