Алматы облысының әкімі Марат Сұлтанғазиев өңір активіне жаңа әкімді таныстырды.
Кездесу барысында өңір басшысы аудан әкімдігінің алдында тұрған міндеттерді атап өтті. Нақтырақ айтсақ:
- инвесторларды тарту жұмыстарын жандандыру;
- ауданның елді мекендерін ауыз сумен жабдықтау жұмыстарын жалғастыру;
- құрылыс жұмыстарының сапалы жүргізілуін және нысандардың уақытылы қолданысқа берілуін қадағалау;
- жұмыс орындарын сақтап қалу және жаңа жұмыс орындарын ашу бойынша жұмысты жалғастыруды;
- пайдаланылмай жатқан жайылымдық жерлерді қайтару бойынша жұмыстарды жандандыру.
«Талғар ауданының потенциалын ескере отырып, бұл өңірдің дамуы үшін бірқатар шаралар қолға алынады. Оның ішінде ауыл шаруашылығы, кәсіпкерлік, туризм, құрылыс және тағы басқа салалар бар», — деді өңір басшысы.
Талғар ауданының әкімі Танат Есенкелдіұлы Айдарбеков 1971 жылы туған, қазақ, білімі жоғары. 1996 жылы Қазақ мемлекеттік аграрлық университетінде «экономист-бухгалтер» мамандығын және 2017 жылы Қазақстан инженерлі-педагогикалық халықтар достығы университетінде «құқық бакалавры» мамандығын тәмамдаған.
Еңбек жолын 1996 жылы «Қуаныш» акционерлік қоғамының есепшісі болып бастады.
Әр жылдары Алматы қаласы Әуезов ауданы әкімі аппаратының экономика бөлімінің бас маманы, Түрксіб ауданы әкімі аппаратының бөлімі басшысы, Түрксіб ауданы әкімінің орынбасары, Бостандық ауданы әкімінің орынбасары, Алматы облысы Кербұлақ ауданы әкімінің орынбасары, Алматы облысы бойынша Қазынашылық департаментінің басшысы лауазымдарын атқарған.
2021 жылдың маусым айынан Алматы қаласы бойынша Қазынашылық департаментінің басшысы қызметінде болған.
