Кәсіпорынның мәліметінше, 3 қаңтарда Жамбыл облысында 30 м/с-қа дейін соққан дауылды жел мен көктайғақ түріндегі жауын-шашын салдарынан «Опорная» қосалқы стансасын (KEGOC» АҚ теңгеріміндегі) электрмен қамтамасыз ететін 220 кВ әуе желілері үзілген.
Компанияда атап өткендей, әуе желілерін тексеру үшін «KEGOC» АҚ-ның қажетті құрал-жабдықтармен және материалдармен жабдықталған жедел топтары жұмылды.
«Түнгі тексеру нәтижесінде құлаған тіректер, сынықтар мен сымның зақымдануы анықталды. 4 қаңтар күні сағат 03:36-да бригадалар жөндеу-қалпына келтіру жұмыстарын бастады», — деп хабарлады «KEGOC» АҚ баспасөз қызметі.
3 қаңтарда Жаңатас қаласында Сарысу ауданы әкімінің қаулысымен дауылды желдің болуына байланысты табиғи төтенше жағдай режимі енгізілді. Жамбыл облысы әкімінің баспасөз қызметі хабарлағандай, өңірде екпіні 30 м/с болатын қатты жел соққан.
4 қаңтарда қатты дауыл салдарынан жеті адам зардап шеккен. Оның бесеуі Талас ауданында, екеуі – Таразда.
«Жағдай тұрақталғаннан кейін қысқа мерзімде электр желілері қалпына келтіріледі. Жуалы, Талас, Жамбыл, Байзақ, Мойынқұм, Шу, Қордай, Рысқұлов, Меркі аудандарында тұрғын үйлер штаттық режимде электр және жылу энергиясымен қамтамасыз етілді», – деп хабарлайды Жамбыл облысының әкімдігі.
Сондай-ақ, Сарысу ауданында орталық аурухана төрт генераторға қосылған. Қазіргі уақытта ауруханада 40-қа жуық адам ем алып жатыр. Балалар автономды жылуы бар жақын маңдағы емханаға ауыстырылды.
Жүкті әйелдерге арналған перзентхана арнайы жылыту құралдарымен жабдықталды.
