Өңір басшысы университеттегі цифрландырылған кітапхананы, SDU Store дүкенін, заманауи жабдықтармен қамтамасыз етілген асхананы, Теннис алаңын аралады.
«Жақында Мемлекет басшысы Қасым-Жомарт Тоқаев өңірге келген сапарында Қонаев қаласын ғылым-білім орталығына және студент жастардың қаласына айналуы керек екенін айтты. «Академиялық қалашықты» құру бойынша құзырлы министрлікпен бірлесе жұмыс істейміз. Облысты дамытуда, алға қойған жоспарларды жүзеге асыруда жастар үлкен рөл атқарады. Биыл мектеп түлектеріне 100-ге жуық грант бөлінеді. Қонаев қаласы жаңадан серпін алып келе жатқандықтан, жастарды облысқа тарту үшін бірқатар жұмыс қолға алынады», – деді университетті аралаған Марат Сұлтанғазиев.
Сондай-ақ ол университетте жаңадан ашылған «Самғау» жас мемлекеттік қызмет мектебінде дәріс берді. Лекция «Әкімдік іс жүзінде қалай жұмыс істейді және бұл ел экономикасының дамуына қалай әсер етеді?» тақырыбында өтті.
СДУ студенттері облыс әкіміне қоғамдық көлік, «Алтын ауыл» ықшам ауданының тазалығы, интернет мәселесіне байланысты сұрақтар қойды.
Анықтама: СДУ 1996 жылы Қазақстан Республикасының Тұңғыш Президенті Нұрсұлтан Әбішұлы Назарбаев пен Түркия мемлекетінің 9-Президенті Сулейман Демирельдің қатысуымен ашылды. Университеттің стратегиялық даму жоспарының басты мақсаты – еліміздегі және Орта Азиядағы таңдаулы, халықаралық үлгідегі жоғарғы оқу орындарының бірі болу. Білім ордасы бүгінгі таңда Алматы облысы Қарасай ауданы Қаскелең қаласындағы 14 гектарлық алаңда орналасқан. Заманауи талаптарға сай 40 мың шаршы метрлік кампус пен 20 000 шаршы метрлік жатақханасы бар. Қазіргі таңда 8 мыңнан астам студент білім алады.
Посмотреть эту публикацию в Instagram
