«Дружба» саяжайы маңындағы 6 гектар жер телімі «Мұрагер» ЖШС тиесілі. Аталған мекеме терең шұңқырды топырақпен тегістеу керек болған. Алайда топырақ емес, қоқыспен толтырған. Салдарынан ауыл маңы қоқыс полигонына айналған. «Сасық иіс қолқаны қабады. Дәл іргесінде бала-шаға ойнайды. Қаншама уақыттан бері төгіп келген, қоқыс тасыған көліктерді жаздан бері кіргізбей қойдық», — дейді «Дружба» саяжайының тұрғыны Нұрлан Алдасүгіров.
Аталған мәселе бойынша «Мұрагер» ЖШС-не 30 айлық есептік көрсеткіш көлемінде айппұл салынған. 15 қыркүйек күні қоқыс маңында өрт шықты. Өртенген қоқыс иісі жарты Алматыны алып кетті. Қалалық төтенше жағдай саласы да «Мұрагер» серіктестігіне айыппұл салған.
«Дружба саяжайындағы тұрғындардың да кінәсі бар. Өйткені бәрібір қоқыс тастап жатыр деп, біраз жылдан бері тұрмыстық қалдықтарын сол алаңға төгіп келеді. Ал «Мұрагер» ЖШС бүгіннен бастап техникаларын алып келіп, қоқыс алаңдарын топырақпен жауып жатыр», — дейді Казцик ауылдық округінің әкімі Бауыржан Жұмабаев.
Ауыл әкімінің айтуынша, бұдан былай «Дружба» тұрғындарын бұл проблема алаңдатпайтын болады.
