«Данияр Жиренбаев атты дәрігер-анестезиолог жедел әрекет етіп, дәрігерлер түнімен науқастың өмірі үшін күресті. Әйелге «Диалог+» құрылғысы арқылы гемодиализ жасалды. Қазір науқастың жағдайы бірқалыпты, жансақтау бөлімінде ем қабылдап жатыр», — дейді аурухананың баспасөз хатшысы Айна Мұқанова.
Данияр Жиренбаевтың айтуынша, заманауи «Диалог+» аппараты өте ауыр хәлде келген науқастың бүйрегін тазалауға көмектесіп, ағзаның қызметін атқаратын құрылғы.
«Әдетте диализді жасау 3-4 сағатқа созылады. «Диалог+» аппаратының қаламызда 1 ғана данасы бар. Тек шұғыл көмек көрсету қажет болған жағдайда ғана қолданылады. Аурухана меншігінде болғанына 1 жылдан асты. Осы уақыт ішінде 7-8 науқас аяқтан тік тұрып кетті. Жаңа технология кез келген ауруханаға қажет деп ойлаймын», — дейді өз сөзінде Данияр Жиренбаев.
Дәрігер-анестезиологтың ақпаратына сүйенсек, аталған науқас Қонаев қаласының тұрғыны және ауруханада тіркелген. Бұған дейін бірнеше мәрте стационарлық ем алып жүрген. Бірақ, осы айда жағдайының күрт нашарлауына қант диабеті себеп болған.
