«Бұл форумды өткізуде Қазақстанның бастамашылық етуі бекер емес. Себебі, қазақ жері ғасырлар бойы батыс пен шығыстың арасындағы көпірге айналды. Ұлы дала төрінде небір алып көшпелі инпериялар өмір сүрген. Діни ұстамдылық олардың барлығына бірдей ортақ», – деді Мемлекет басшысы.
Президент өз сөзінде елдің оңтүстігінде анықталған тарихи ғибадатханалар туралы да айта кетті.
«Қойлық дейтін ортағасырлық қалада қазба жұмыстары жүргізілді. 12-14 ғасырда осы қалада ислам және христиан, буддизм дінінің ғибадатханалары іргелес тұрғаны анықталды. Шын мәнінде Қазақстан аумағы барлық әлемдік діндердің орындары көрініс тапқан карта іспетті. Мұсылмандар Арыстан бап және Қожа Ахмет Ясауидің кесенелеріне барып зиярат етеді», – деді Қасым-Жомарт Тоқаев.
Мемлекет басшысының айтуынша, қазір елімізде 18 конфессия, 4 мыңға жуық діни бірлестік бар.
