3–7 қараша аралығында елордада ұйымдастырылған республикалық додаға Қазақстанның 17 өңірінен 1700 жас спортшы жиналды. Бес күнге созылған жарыста қатысушылар бокс, еркін күрес, каратэ, баскетбол, волейбол, шахмат, үстел теннисі және шағын футболдан кіл мықтыны анықтады.
Биыл үшінші маусымын өткізген AUYL SPORT жобасының ауқымы жыл сайын кеңейіп келеді. Егер алғашқы маусымда республикалық финалға 1300 бала қатысса, биыл бұл көрсеткіш 1700-ге жетті. Ал өңірлік іріктеу кезеңдерінде еліміздің 400-ден астам ауылынан 12 мыңнан аса жасөспірім бақ сынаған.
Алматы облысы алтын медаль саны бойынша көш бастады
Республикалық турнир қорытындысында 107 медаль сарапқа салынды. Оның 30-ы алтын, 30-ы күміс және 47-сі қола.
Алматы облысының жас спортшылары бес алтын, екі күміс және сегіз қола медаль иеленіп, жалпы есепте 15 жүлде жинады. Алтын медаль саны бойынша өңір Атырау облысымен бірдей нәтиже көрсетті. Атыраулық спортшылар да бес мәрте жеңіс тұғырының ең биік сатысына көтерілді.
Үздіктер қатарынан Маңғыстау облысының өкілдері де көрінді. Олар төрт алтын, үш күміс және үш қола медаль жеңіп алды. Жамбыл облысының спортшылары үш алтын, үш күміс және бір қола жүлдеге қол жеткізді.
Ал жалпы медаль саны бойынша Түркістан облысы алға шықты. Бұл өңірдің спортшылары екі алтын, жеті күміс және жеті қола медаль иеленіп, 16 жүлдемен турнирді аяқтады.
Алматы облысы үшін бес алтын медаль – жас спортшылардың жеке жетістігі ғана емес, ауылдардағы жаттықтырушылар еңбегінің де нәтижесі. Өйткені республикалық деңгейдегі бәсекеде жеңіске жету үшін спортшының табиғи қабілетімен қатар, жүйелі дайындық, тәжірибе және тұрақты жаттығу процесі қажет.
Алматы облысының ауыл командалары халықаралық аренада да танылып жүр
Өңірдегі ауыл спортының әлеуетін халықаралық жарыстардағы нәтижелер де көрсетеді. Биыл Түркияда ұйымдастырылған волейбол турнирінде Алматы облысының Жансүгіров ауылынан барған қыздар командасы мен Өтеген батыр ауылының ұлдар құрамасы чемпион атанды. Шетелдік бәсекеде топ жарған жас волейболшылар ауыл командаларының халықаралық деңгейдегі қарсыластармен бәсекелесе алатынын дәлелдеді.
Бұдан бөлек, Ыстықкөлде өткен баскетбол жарысында Қоңырөлең ауылының командасы қола медаль жеңіп алды.
Бұл жетістіктердің маңызы ерекше. Әдетте кәсіби спортқа жол ашатын инфрақұрылым мен жоғары деңгейдегі жаттығу мүмкіндіктері ірі қалаларда шоғырланған. Ал ауылдық жерлерде спортпен айналысатын балалар үшін жарыс тәжірибесін жинау, өзге өңірлердің мықты спортшыларымен кездесу және халықаралық турнирлерге қатысу маңызды мүмкіндік саналады.
AUYL SPORT жобасы осы алшақтықты азайтуға бағытталған. Республикалық турнир ауыл балаларына өз мүмкіндігін көрсетуге, тәжірибе жинақтауға және спорттық шеберлігін шыңдауға жағдай жасап отыр.
Жеңімпаз ауылдарда жаңа спорт алаңдары салынады
Биылғы турнирдің басты ерекшелігі – жеңімпаздарды марапаттаумен шектелмей, ауылдардағы спорт инфрақұрылымын дамытуға басымдық берілуі. Тимур Құлыбаевтың Halyk қайырымдылық қоры алдағы үш жылда еліміздің 10 ауылында заманауи көпфункционалды спорт алаңдарын салуды жоспарлап отыр. Алғашқы үш нысан биыл жеңімпаз атанған командалардың ауылдарында бой көтермек. Қалған жеті алаң жобаның келесі кезеңдерінде салынады. Жаңа спорт нысандары баскетбол, волейбол, шағын футбол және дене шынықтыру жаттығуларына арналған. Ең бастысы, бұл алаңдар тек турнир жеңімпаздарына ғана емес, ауылдағы барлық балаларға қолжетімді болады. Мұндай бастаманың әлеуметтік маңызы да зор. Бір команданың республикалық жарыстағы жеңісі тұтас ауылдың спорттық инфрақұрылымын жақсартуға мүмкіндік береді. Демек, бүгін медаль алған жас спортшылардың жетістігі ертең сол ауылдағы өзге балалардың спортпен тұрақты айналысуына негіз болмақ.
Ауыл спортының дамуы жаттықтырушының біліктілігіне де байланысты
Жас спортшылардың нәтижесіне әсер ететін негізгі факторлардың бірі – жаттықтырушылардың кәсіби дайындығы. Сондықтан AUYL SPORT жобасында балалар арасындағы жарыстармен қатар, ауыл бапкерлерінің біліктілігін арттыруға да көңіл бөлініп келеді.
Биыл еркін күрестен ұйымдастырылған арнайы семинарға еліміздің 17 өңірінен 50-ден астам жаттықтырушы қатысты. Мамандар спортшыларды дайындаудың заманауи тәсілдерімен танысып, тәжірибе алмасты.
Сондай-ақ халықаралық сарапшы Уве Бремнің қатысуымен үш қалада шахмат жаттықтырушыларына арналған оқыту курстары өтті. Нәтижесінде ауылдық жерлерде жұмыс істейтін 50-ден астам маман кәсіби білімін жетілдірді.
Жобаның тағы бір маңызды тұсы – республикалық турнирге қатысушылардың жол жүру, тұру және тамақтану шығындарын Halyk қайырымдылық қоры толық өтейді. Бұл шалғай ауылдардағы балалардың отбасының қаржылық мүмкіндігіне қарамастан, ел біріншілігі деңгейіндегі жарыстарға қатысуына жағдай жасайды.
Ауыл спорты – ел спортының резерві
Қазақстан спортының болашағы тек ірі қалалардағы спорт мектептері мен кәсіби клубтарға байланысты емес. Ауылдарда да қабілетті, еңбекқор, үлкен спортқа ұмтылатын жасөспірімдер аз емес. Олардың әлеуетін ашу үшін жүйелі дайындық, білікті жаттықтырушы, жарыс тәжірибесі және қолжетімді спорт инфрақұрылымы қажет.
AUYL SPORT–2026 турнирінің нәтижелері осы бағыттағы жұмыстың маңызын көрсетті. Әсіресе Алматы облысының бес алтын, екі күміс және сегіз қола медаль жеңіп алуы өңірдегі ауыл спортшыларының бәсекеге қабілетті екенін аңғартты.
Дегенмен жасөспірімдер арасындағы жарыстағы жеңіс – кәсіби спортқа апарар жолдың алғашқы баспалдақтарының бірі ғана. Ендігі маңызды міндет – осындай турнирлерде көзге түскен талантты балалардың спорттық дамуын үздіксіз жалғастыруына жағдай жасау.
Өйткені бүгін ауыл намысын қорғап, республикалық турнирде топ жарған жас спортшы ертең халықаралық аренада Қазақстанның көк туын көтеруі мүмкін. Ал оған бастайтын жол ауылдағы қарапайым спорт алаңынан басталады.
