Ішкі істер министрлігінің мәліметінше, жаңа жүйе 21 қазан күні сағат 00:00-ден бастап іске қосылған. Оның басты ерекшелігі – жолдың әр бөлігінде рұқсат етілген жылдамдықтың әртүрлі болуы. Сондықтан жүргізушілер жол белгілеріне мұқият назар аударып, белгіленген жылдамдық шектеулерін сақтауы тиіс.
Орташа жылдамдық қалай есептеледі?
Жүйе жолдың басы мен соңында орналасқан арнайы камералар арқылы жұмыс істейді. Камералар көліктің бақылау нүктелерінен өткен уақытын тіркеп, жүріп өткен қашықтық пен жұмсалған уақыт негізінде орташа жылдамдықты есептейді.
Яғни жүргізуші тек камераға жақындағанда жылдамдығын төмендеткенімен, бұл ереже бұзушылықтан құтқармайды. Егер бақылаудағы учаскеде белгіленген жылдамдық режимі бұзылса, жүйе оны автоматты түрде тіркейді.
ІІМ Әкімшілік полиция комитеті басқарма бастығының орынбасары Ақтоты Боранованың айтуынша, жаңа жүйенің негізгі мақсаты – жүргізушілерді жазалау емес, жол қозғалысы қауіпсіздігін арттыру.
«Біздің мақсатымыз – жазалау емес. Жүргізушілердің тек камера алдында емес, бүкіл жол бойы қауіпсіз жылдамдықты сақтағанын қамтамасыз ету. Жылдамдықты асыру әлі де тасжолдағы ауыр жол апаттарының басты себебі болып отыр. Сондықтан өзіңізді және жолаушыларыңызды сақтаңыз!» – деді Ақтоты Боранова.
Полиция жүргізушілерді Қонаев – Бақанас бағытында жол белгілерін қатаң сақтауға, жылдамдықты асырмауға және жолдағы қауіпсіздік талаптарын орындауға шақырады.
