Бүгінде саябақтар мен скверлер тұрғындар серуендеп, балаларымен демалатын, спортпен шұғылданатын және бос уақытын өткізетін ортақ кеңістікке айналған.
Өңірдің елді мекендерінде қоғамдық аумақтарды ретке келтіру жұмыстары жтұрақты жүргізіледі. Жаяу жүргіншілер жолдары тазартылып, қоқыс шығарылып, жасыл желектер күтіп-бапталады. Сонымен қатар абаттандыру нысандарының жекелеген элементтері жаңартылып жатыр.
Мұндай жұмыстардың нәтижесі әсіресе отбасылар үшін маңызды. Таза әрі күтімі жақсы саябақтар мен скверлер тұрғындарға жұмыстан кейін тынығып, балаларымен серуендеуге және таза ауада уақыт өткізуге мүмкіндік береді.
Дегенмен қоғамдық кеңістікті абаттандырумен жұмыс аяқталмайды. Жасалған жағдайды сақтап қалу үшін мұндай аумақтар тұрақты күтімді қажет етеді. Бұл ретте коммуналдық қызметтердің жұмысымен қатар тұрғындардың жауапкершілігі де маңызды.
Қоғамдық орындарда қоқыс қалдырмау, орындықтар мен балалар алаңдарын бүлдірмеу, ағаштар мен жасыл желектерге ұқыпты қарау – әр тұрғын ұстануға тиіс қарапайым қағидалар. Өйткені қоғамдық кеңістіктің тазалығы мен жай-күйі оны пайдаланатын адамдардың мәдениетіне де тікелей байланысты.
«Таза Қазақстан» бастамасының негізгі мақсаты да тек ластанған аумақтарды тазалаумен шектелмейді. Бағдарлама тұрғындардың қоршаған ортаға жауапкершілікпен қарауын қалыптастырып, тазалығы мен көркі сақталатын қолайлы орта құруды көздейді.
Алматы облысының елді мекендерінде абаттандырылған қоғамдық кеңістіктер көбейген сайын көшелердің келбеті де өзгеріп жатыр. Ал таза әрі жайлы ортаны сақтау тұрғындар мен жауапты қызметтердің ортақ міндетіне айналмақ.
