Бұл мәселелер Қазақстан Премьер-министрінің орынбасары Қанат Бозымбаевтың Корея Республикасына жұмыс сапары барысында талқыланды. Ол Korea Electric Power Corporation (KEPCO), Lotte Hotels & Resorts, Doosan Enerbility және Global Green Growth Institute (GGGI) басшылығымен келіссөздер жүргізді.
Келіссөздер барысында корей компанияларының Alatau City-дегі инфрақұрылымдық және инвестициялық жобаларды іске асыруға қатысуы талқыланған.
Атап айтқанда, Doosan Enerbility және GGGI басшылығымен Alatau City-де қуаты 2×250 МВт болатын, кейіннен сутегіге көшу мүмкіндігі бар газ электр стансасын салу мәселесі талқыланды. Жобаны мемлекеттік-жекешелік әріптестік тетіктерін қолдана отырып іске асыру қарастырылған.
Ал Lotte Hotels & Resorts компаниясымен Alatau City-де L7 by Lotte қонақүйі бар көпфункционалды кешенді іске асыру мүмкіндігі талқыланды. Құны 200 миллион доллардан асатын жоба 180 бөлмелі қонақүйді, кеңсе кеңістіктерін және тұрғын апартаменттерді көздейді.
Қазақстан үкіметінің мәліметінше, қазір Alatau City-дің инвестициялық портфеліне жалпы құны 6,9 миллиард доллар болатын 67 жоба кіреді. Оларды іске асыру нәтижесінде 55 мыңнан астам жұмыс орны ашылады деп жоспарланған.
