Алматы облысы әкімдігінің мәліметінше, салынып жатқан баспаналар тұрғындарға жеңілдетілген несие тетіктері арқылы ұсынылады. Бұл өңірдегі тұрғын үй кезегін азайтып, әсіресе әлеуметтік осал санаттағы отбасылардың баспана мәселесін шешуге бағытталған.
Өңірде тұрғын үйге сұраныс әлі де жоғары. Қазіргі таңда Алматы облысында 70 мыңға жуық адам баспана кезегіне тіркелген. Оның 21 510-ы әлеуметтік осал санаттағы азаматтар.
Былтыр облыста осы санатқа жататын 3 мыңнан астам тұрғын баспаналы болған. Биыл да аудандар мен қалаларда тұрғын үй құрылысы мен дайын пәтерлерді сатып алу жұмыстары жалғасуда.
Іле ауданында 300 отбасы қоныс тойын тойламақ
Тұрғын үй құрылысы белсенді жүріп жатқан аудандардың бірі – Іле ауданы. Биыл мұнда кезекте тұрған 300 отбасын баспанамен қамту жоспарланған.
Нұрғиса Тілендиев ауылында осы мақсатта 10 гектар жерге екі пәтерден тұратын 95 тұрғын үй салынған. Қазір үйлердің маңын абаттандыру жұмыстары жүргізіліп жатыр.
Аудандық құрылыс бөлімінің басшысы Ғазиз Исабайдың айтуынша, жаңа үйлер толық дайын күйінде тұрғындарға беріледі.
«Үйлердің сыртқы қасбеті травертинмен қапталып, су, газ, электр желілері тартылып, ішкі әрлеу жұмыстары толық жүргізіледі. Әр тұрғын үйдің жалпы аумағы 85 шаршы метрді құрайды. Қазір аумақты абаттандыру жұмыстары жүріп жатыр. Алдағы уақытта жеке инвестор есебінен спорт және балалар ойын алаңдары, шағын демалыс орындары салынады. Үйлер тұрғындарға тапсырылғанға дейін жеке инвестордың бақылауында болады», – деді Ғазиз Исабай.
Баспананы кейін сатып алу мүмкіндігі қарастырылған
Жаңа баспаналар «Отбасы банк» арқылы жалға беру және кейін сатып алу тетігі бойынша рәсімделеді. Ипотекалық төлемнің бір бөлігі бюджет есебінен субсидияланады.
Сонымен қатар облыста «Алатау» өңірлік тұрғын үй бағдарламасы бойынша құжат қабылдау жалғасып жатыр. 2025 жылы аталған бағдарламаға 3,7 млрд теңге бөлініп, 132 отбасы баспаналы болған.
Биылғы құрылыс пен пәтер сатып алу жоспары толық орындалса, өңірде тағы бірнеше мың отбасының баспана мәселесін шешуге мүмкіндік туады.
