Алматы облысында құны 18,1 млрд теңгені құрайтын жоба жүзеге асырылып жатыр. Ол өңірдегі жаңа піскен көкөністер нарығына елеулі ықпал етуі мүмкін. Аймақта аумағы 8 гектар болатын жылыжай кешені салынып, оған өнімді сақтау және логистика жүйелері де енгізіледі. Жоба аясында 400-ден астам жұмыс орны ашылады деп жоспарлануда. Ал әлеуметтік маңызы бар азық-түлік тауарларының бағасы кемінде 10%-ға төмендеуі мүмкін.
Алматы облысында «Alatau Green Production» ЖШС-нің ірі жылыжай кешені бой көтеріп жатыр. Жобаның жалпы аумағы 16 гектарды құрайды. Оның 8 гектары тікелей жылыжай өндірісіне арналған.
2024–2026 жылдары жобаға тартылатын инвестиция көлемі 18,1 млрд теңге деп бағаланып отыр. Жоба тек жылыжай кешенін салумен шектелмейді. Оның құрамында көкөніс қоймасы мен қажетті инженерлік инфрақұрылым да қарастырылған.
Көкөніс өндірушіден тұтынушыға тікелей жеткізіледі
Жобаның негізгі міндеттерінің бірі – жаңа піскен өнімді жеткізудің қалыптасқан тізбегін өзгертіп, өндіруші мен тұтынушы арасындағы делдалдар санын азайту.
Компанияның есебінше, өнімді өз күшімен өндіру, сақтау және тасымалдау шығындарды қысқартып, өнімнің ысырабын барынша азайтуға мүмкіндік береді. Бұл өз кезегінде тауардың соңғы бағасына да әсер етуі тиіс.
Жоспарға сәйкес, әлеуметтік маңызы бар азық-түлік тауарларының бағасы «Magnum» дискаунтерлік желісіндегі бағадан кемінде 10%-ға төмен болуы мүмкін.
Яғни жоба өндіріс көлемін арттырумен қатар, тұтынушылар үшін қолжетімді бағадағы өнім ұсынысын қалыптастыруға бағытталған.
Жылына 12 мың тонна өнім
Жылыжай кешенінде өнімділігі жоғары, ассортименті кең жылыжай көкөністерінің гибридті сұрыптарын өсіру жоспарланған.
Жобаның жалпы өндірістік және қоймалық қуаты жылына 12 мың тоннаға дейін жеміс-көкөніс өнімін құрайды.
Жобада заманауи сақтау жүйесін құруға да ерекше мән берілген. Ол маусымдық көкөністерді ұзақ уақыт бойы сақтап, олардың дәмдік және сыртқы қасиеттерін айтарлықтай жоғалтпауға мүмкіндік береді.
Сонымен қатар компания Қазақстан нарығында сұранысқа ие маусымдық жемістерді импорттауды да жоспарлап отыр.
400-ден астам жаңа жұмыс орны ашылады
Жобаның тағы бір маңызды нәтижесі – жаңа жұмыс орындарының құрылуы.
Кәсіпорында 400-ден астам адамды жұмыспен қамту жоспарланып отыр. Ұсынылған мәліметке сәйкес, орташа жалақы шамамен 370 мың теңгені құрайды.
Бұл өңір үшін өндіріс, сақтау және жеміс-көкөніс өнімдерін тасымалдау салаларында жаңа тұрақты жұмыс орындарын ашатын ірі жұмыс берушінің пайда болуын білдіреді.
Өңір экономикасына миллиардтаған үлес
Жобаның Алматы облысының экономикасы үшін де маңызы болуы мүмкін. Компанияның есептеуінше, оны іске асыру өңірдің жалпы ішкі өнімін жыл сайын 8–10 млрд теңгеге арттыруға мүмкіндік береді.
Демек, сөз кезекті жылыжай шаруашылығын салу туралы ғана емес. Инвестор өнімді өсіруден бастап оны сақтауға, одан әрі нарыққа жеткізуге дейінгі барлық кезеңді қамтитын өндірістік-логистикалық кешен құруды көздеп отыр.
Жобаны іске асыруға не кедергі болуы мүмкін?
Жобаны іске қосу үшін инфрақұрылымға қатысты бір мәселені шешу қажет.
«Alatau Green Production» ЖШС-не Талғар ауданы әкімдігінің Дінмұхамед Ахметұлы Қонаев атындағы Үлкен Алматы каналы (ҮАК) арқылы көпір салуға арналған жер учаскесін келісуі қажет.
Компанияның мәліметінше, қажетті техникалық шарттардың барлығы алынған.
Инвестициялық жобаны іске асыру жөніндегі өзара түсіністік туралы меморандумға 2024 жылғы қарашада «KAZAKH INVEST» ҰК» АҚ, Алматы облысының әкімдігі және «Alatau Green Production» ЖШС арасында қол қойылған.
Егер жоба осы параметрлерге сай іске асса, Алматы облысында жылына 12 мың тоннаға дейін жеміс-көкөніс өнімін өндіретін ірі жылыжай кешені, 400-ден астам жаңа жұмыс орны және өнімді сақтауға әрі тасымалдауға арналған жеке инфрақұрылым пайда болады.
Айта кетейік, Алматы облысында қазір жалпы аумағы 87,2 гектарды құрайтын 49 жылыжай шаруашылығы жұмыс істеп тұр. Оның 19-ы өнеркәсіптік жылыжай, олардың аумағы 55,4 гектарды құрайды. Тағы 19 фермерлік жылыжай 14,1 гектар жерді алып жатыр. Қарапайым жылыжайлар саны — 11, жалпы аумағы — 17,6 гектар.
Мемлекеттік қолдаудың аясында өңірдегі жылыжайлар ішкі нарықты көкөніспен қамтамасыз етудің маңызды көздерінің біріне айналып отыр.
Бүгінгі күнге дейін облыстағы жылыжай шаруашылықтары 15,9 мың тонна көкөніс өндірген. Оның ішінде 9,3 мың тоннасы — қызанақ, 5,8 мың тоннасы — қияр, 0,8 мың тоннасы — көк шөп пен салат.
Өнімнің 1 434,3 тоннасы экспортталған. Жылыжайларда жиналған көкөністер негізінен Алматы облысы мен Алматы қаласының базарларында сатылуда.
Алматы облысында жылыжай шаруашылығын қолдау және дамыту жұмыстары қолданыстағы заңнама аясында жалғаса береді.
