Іле ауданы Ащыбұлақ ауылдық округінде ауыл шаруашылығын қолдауға бағытталған жұмыстар жалғасуда. Алма жинау науқаны кезінде ауылдық округ әкімдігінің қызметкерлері «Гаухар» шаруа қожалығына барып, маусымдық жұмыстарға волонтерлік негізде атсалысты.
Шаруашылық 2014 жылдан бері алма өсірумен айналысады. Қазіргі уақытта, қожалықтың 8,7 гектар жерінде 3250 түп алма ағашы өсіріледі. Мұнда «Восход», «Ред Делишес» және «Голден Делишес» сорттары бапталады.
Әкімдік қызметкерлері бір күнін шаруашылық жұмысына арнап, алма жинауға көмектесті. Бұл бастама ауыл шаруашылығындағы еңбек адамдарына қолдау көрсетіп, маусымдық жұмыстарға жәрдемдесудің нақты үлгісіне айналды.
Ұжымдық еңбек ауылдағы шаруалар мен мемлекеттік қызметкерлер арасындағы өзара қолдауды нығайтып қана қоймай, ауыл шаруашылығына деген жанашырлық пен еңбекке құрметті арттыруға ықпал етеді.
