FlyArystan әуе компаниясының мәліметінше, 2026 жылғы 15 қыркүйектен бастап Қытайға кіру және елден шығу тәртібіндегі өзгерістер күшіне енеді. Осыған байланысты иммиграциялық бақылау кезінде жолаушылардың құжаттарын тексеру рәсімі әдеттегіден ұзаққа созылуы мүмкін.
«Қытайға баратын немесе осы елден ұшатын жолаушыларға сапарға қажетті құжаттарының, соның ішінде паспортының бар-жоғын және жарамдылық мерзімін алдын ала тексеруге, сондай-ақ ҚХР-ға кіру және одан шығуға қатысты өзекті талаптармен танысуға кеңес береміз», – делінген әуе компаниясының хабарламасында.
Сондай-ақ жолаушыларға паспорттық және иммиграциялық бақылаудан өтуге қосымша уақыт қарастырып, әуежайға рейс ұшардан кемінде үш сағат бұрын келу ұсынылды.
Бұл ретте Қазақстан мен Қытай арасындағы визасыз режим күшінде қала береді. Қазақстан азаматтары бір сапар барысында Қытай аумағында визасыз 30 күнтізбелік күнге дейін бола алады.
Бұған дейін 6 қыркүйекте Алматы халықаралық әуежайының Майлин көшесі жағындағы негізгі кіреберісі ашылғаны хабарланған еді.
