VI Дүниежүзілік көшпенділер ойындары 31 тамыз бен 6 қыркүйек аралығында Қырғызстанда өтті. Жарыс бағдарламасы 1 қыркүйекте басталып, биылғы додаға әлемнің 113 елінен 3 мыңға жуық спортшы қатысты. Олар 43 спорт түрінен жүлделерді сарапқа салды.
Қазақстан құрамасы жарыстың алғашқы күнін медальсыз аяқтағанымен, кейінгі күндері қарқынын айтарлықтай күшейтті. 2 қыркүйекте спортшыларымыз 10 медаль жеңіп алса, 3 қыркүйекте бір күннің өзінде 24 жүлдеге қол жеткізді. Оның 12-сі – алтын, 7-еуі – күміс, 5-еуі – қола.
4 қыркүйекте қазақстандық спортшылар ел қоржынына тағы 21 медаль қосып, жалпы есепте көш бастады. 5 қыркүйекте құрамамыз бір алтын, бір күміс және бір қола медаль иеленді.
Жарыстың шешуші күні де Қазақстан үшін сәтті өтті. Спортшыларымыз 16 медаль – 6 алтын, 6 күміс және 4 қола жүлде жеңіп алды.
Әсіресе ұлттық зияткерлік ойындарда қазақстандықтар жоғары нәтиже көрсетті. Тоғызқұмалақ пен мангалдан 11 медаль, соның ішінде 6 алтын жүлде еншіледі. Көкбөрі мен көкпардан Қазақстан құрамасы күміс медаль иеленді.
Осылайша, Қазақстан VI Дүниежүзілік көшпенділер ойындарын 74 медальмен аяқтады. Ұлттық құраманың қоржынында 32 алтын, 20 күміс және 22 қола жүлде бар.
Жалпы медальдық есепте екінші орын Қырғызстан құрамасына бұйырды. Алаң иелері 30 алтын, 35 күміс және 19 қола – барлығы 84 медаль жеңіп алды. Үшінші орынға 7 алтын, 8 күміс және 21 қола медаль иеленген Ресей құрамасы тұрақтады.
Командалардың жалпы есептегі орны ең алдымен жеңіп алған алтын медаль санына қарай анықталды. Сондықтан Қазақстан жалпы жүлде саны бойынша Қырғызстаннан аз медаль иеленгеніне қарамастан, 32 алтынмен көш бастады.
Қазақстан Президенті Қасым-Жомарт Тоқаев ұлттық құраманы VI Дүниежүзілік көшпенділер ойындарындағы табысты өнерімен құттықтады. Мемлекет басшысы додада ерекше көзге түскен спортшылардың еңбегі лайықты бағаланатынын атап өтті.
