Өз таңдауын жасағаннан кейін өңір басшысы журналистерге сайлаудың өту барысы туралы айтып, облыста сайлаушылар үшін қажетті жағдай жасалғанын атап өтті.
“Бүгін — еліміз үшін маңызды саяси күн. Мен де Алматы облысының тұрғыны әрі Қазақстан азаматы ретінде тіркелген сайлау учаскеме келіп, өз таңдауымды жасадым. Жалпы, біздің өңірде миллионнан астам азамат дауыс беруге құқылы. Бүгін облыста 683 сайлау учаскесі жұмыс істеуде. Сайлаушыларға қажетті жағдайдың бәрі жасалған”, — деді Марат Сұлтанғазиев.
Облыс әкімі сайлау нәтижелері еліміздің одан әрі дамуына оң әсер ететініне сенім білдіріп, бұл саяси науқан Қазақстан үшін маңызды кезең екенін атап өтті.
“Мемлекет басшысы Қасым-Жомарт Кемелұлы Тоқаев өз Жолдауында бұл сайлау ұлт тағдырына тікелей әсер ететін тарихи оқиға екенін атап өтті. Саяси шара қоғамдық диалогты жаңа деңгейге көтеріп, еліміздің болашағын бірге айқындауға мүмкіндік береді”, — деді өңір басшысы.
Айта кетейік, 23 тамызда сағат 07:00-ден бастап Алматы облысында 683 сайлау учаскесі жұмысын бастады. Сайлау барысын отандық және халықаралық байқаушылар бақылап отыр.
