Биылғы шомылу маусымында Қонаев қаласының коммуналдық жағажайларында кезекшілік атқарған құтқарушылар 200-ден астам адамды судан аман алып қалды. Әрбір құтқарылған өмір – мамандардың жедел әрекеті мен кәсіби дайындығының нәтижесі.
Судағы төтенше жағдай кейде санаулы секундтың ішінде туындайды. Демалушылардың қауіпсіздік талаптарын елемеуі немесе өз мүмкіндігін дұрыс бағаламауы қайғылы жағдайға әкелуі мүмкін. Бірінің суда аяғы тартылса, енді бірі тереңге кетіп, өздігінен жағаға шыға алмай қалады. Осындай сәттерде құтқарушылар уақыт жоғалтпай көмекке ұмтылып, адам өмірін арашалап қалады.
Шомылу маусымында ерекше көзге түсіп, ең көп адамды құтқарған қызметкерлердің еңбегі елеусіз қалмады. Қонаев қаласы әкімінің орынбасары Марат Тұрсын оларға қала әкімінің Алғыс хаттарын табыстады.
Марапатталғандардың қатарында 12 адамды құтқарған Самғат Сәрсек, 11 адамды құтқарған Саят Нұртай, 10 адамды құтқарған Дәулет Кумархан, сондай-ақ сегіз адамнан құтқарған Дмитрий Зиновьев пен Нұрбол Маратұлы бар.
Марапаттау рәсімінде қала әкімінің орынбасары құтқарушылардың күнделікті еңбегі үлкен жауапкершілік пен батылдықты талап ететінін атап өтті.
«Құтқарушы – қиын сәтте бірінші болып көмекке келетін, өз өміріне қауіп төнсе де, өзгенің өмірін құтқаруды басты міндеті санайтын маман. Бұл – үлкен жүрек пен жоғары кәсібилікті талап ететін жауапты қызмет. Сіздерге адал қызметтеріңіз, батылдықтарыңыз бен жоғары жауапкершіліктеріңіз үшін алғыс айтамын. Әрқайсыңызға мықты денсаулық, отбасыларыңызға амандық, қызметтеріңізге табыс тілеймін», – деді Марат Тұрсын.
Марапатталған құтқарушылардың бірі Самғат Сәрсек үшін осы маусымдағы есте қалған оқиғалардың бірі №5 жағажайда болған. Демалуға келген жастардың бірі суға түскен кезде аяғы тартылып, бата бастаған.
Жағдайды дер кезінде байқаған Самғат бірден суға түсіп, жас жігітке көмекке ұмтылған. Нәтижесінде оны қауіпсіз жерге алып шығып, өмірін сақтап қалды.
«Бәрі бірнеше секундтың ішінде болды. Оның қиналып жатқанын көрген бойда ойланбастан көмекке бардым. Бастысы – адамды аман алып қалу», – дейді Самғат Сәрсек.
Құтқарушылардың айтуынша, жағажайдағы қауіпсіздік тек мамандардың жұмысына ғана байланысты емес. Әр демалушы қарапайым ережелерді сақтап, өз өмірі мен жақындарының қауіпсіздігіне жауапкершілікпен қарауы қажет.
Мамандар тек белгіленген және шомылуға рұқсат етілген жағажайларда суға түсуге, балаларды қараусыз қалдырмауға, жағадан тым алысқа жүзбеуге және өз мүмкіндігін дұрыс бағалауға кеңес береді.
Жазғы маусым аяқталуға жақындағанымен, судағы қауіпсіздік талаптары өзектілігін жоғалтпайды. Өйткені құтқарушылар үшін ең үлкен нәтиже – марапат емес, аман қалған адам өмірі.
