Оқиға шамамен 2650 метр биіктіктегі Терра алаңы маңында болған. Бір топ турист қыз таудан түсіп келе жатқанда олардың бірі аяғын қайырып алып, өздігінен қозғала алмай қалған. Осыдан кейін туристер құтқарушылардың көмегіне жүгінген.
Құтқару операциясына ҚР ТЖМ «Барыс» республикалық құтқару қызметінің және Алматы қаласы әкімдігінің Мониторинг және жедел әрекет ету орталығының құтқарушылары жұмылдырылды.
Мамандар зардап шеккен туристке жаяу жетіп, оқиға орнында алғашқы медициналық көмек көрсетті. Кейін оны таулы аймақтан төменге қауіпсіз тасымалдады.
Алдын ала диагноз бойынша туристің аяғы сынған және кеуде қуысы соғылған. Зардап шеккен әйел таудан аман-есен эвакуацияланып, әрі қарай тексеру және қажетті медициналық көмек көрсету үшін Апаттар медицинасы орталығының қызметкерлеріне тапсырылды.
