Министрлік мәліметінше, жаңа оқу жылы 2026 жылғы 1 қыркүйекте басталып, 2027 жылғы 25 мамырда аяқталады. Оқушылар дәстүрлі түрде күзгі, қысқы және көктемгі каникулға шығады. Ал бірінші сынып оқушылары үшін ақпан айында қосымша бір апталық демалыс қарастырылған.
Жаңа оқу жылында бірінші тоқсан сегіз оқу аптасына созылады. Күзгі каникул 2026 жылғы 26 қазан мен 1 қараша аралығында, яғни жеті күнге жалғасады.
Екінші тоқсан да сегіз аптаға жоспарланған. Қысқы демалыс 2026 жылғы 28 желтоқсаннан 2027 жылғы 10 қаңтарға дейін жалғасып, барлығы 14 күнді құрайды.
Бірінші сынып оқушылары үшін қосымша демалыс 2027 жылғы 8–14 ақпан аралығында өтеді.
Үшінші тоқсан он оқу аптасына созылады. Көктемгі каникул 2027 жылғы 22–28 наурыз аралығында жеті күнге беріледі.
Төртінші тоқсан сегіз аптаға созылып, оқу жылы 2027 жылғы 25 мамырда аяқталады.
