Биылғы жылдың алғашқы алты айының өзінде ойын бизнесі субъектілері мемлекеттік бюджетке 25 миллиард теңге салық аударған. Оның 10,6 миллиард теңгесі облыстық бюджет кірісін толықтырды.
Қазіргі таңда Қонаев қаласында ойын бизнесі саласында 21 заңды нысан жұмыс істейді. Олардың қатарында 5 казино, 13 букмекерлік кеңсе және 3 ойын автоматтары залы бар. Бұл салада шамамен 2,5 мың адам еңбек етеді.
Облыс әкімдігінің мәліметінше, ойын бизнесі өңірдегі туризмнің дамуына да әсер етіп отыр. Алматы облысы Туризм басқармасының дерегіне сәйкес, Қонаев қаласындағы казиноларға келушілердің шамамен 20 пайызы – шетел азаматтары.
Алматы облысы Туризм басқармасының басшысы Қуанышбек Мирамбекұлының айтуынша, ойын-сауық инфрақұрылымы туристердің өңірде көбірек уақыт өткізуіне ықпал етеді.
«Қонаев қаласына келген әрбір турист қонақүйлерге орналасып, қоғамдық тамақтану орындарына барады, көлік, сауда және басқа да қызмет түрлерін пайдаланады. Бұл өз кезегінде шағын және орта бизнестің дамуына, жаңа жұмыс орындарының ашылуына және жергілікті экономиканың жандануына ықпал етеді. Сондықтан туристік ағынның артуы өңірдің қызмет көрсету саласының дамуына оң әсерін тигізуде», – деді Қуанышбек Мирамбекұлы.
Сонымен қатар Алматы облысында жаңа ойын аймағын құру мәселесі қарастырылып жатыр. Қолданыстағы «Ойын бизнесі туралы» заң аясында Талғар ауданында тек шетел азаматтарына арналған ойын аймағын ашу жоспарланған. Бастама қоғамдық кеңестің қарауынан өтіп, оң қорытынды алған.
Жаңа аймақты дәл Талғар ауданында орналастыру ұсынысы өңірдің туристік әлеуетімен байланысты. Аудан Алматы қаласы мен халықаралық әуежайға жақын орналасқан. Сонымен қатар мұнда тау туризмі, сауықтыру және демалыс бағытындағы ірі туристік нысандар шоғырланған.
«Талғар ауданы туристік инфрақұрылымы қалыптасқан өңірлердің бірі. Мұнда «Ақбұлақ» спорттық-сауықтыру кешені, Oi-Qaragai тау-шаңғы курорты, Aquaasia Resort және Tal Resort демалыс кешендері сияқты танымал туристік нысандар орналасқан. Сондықтан жаңа ойын аймағын өңірдің туристік экожүйесінің бір бөлігі ретінде дамыту көзделіп отыр. Бұл туристерге ұсынылатын қызмет түрлерін әртараптандырып, сервистік инфрақұрылымның одан әрі дамуына мүмкіндік береді», – деді басқарма басшысы.
Әкімдік мәліметінше, жобаны іске асыру нәтижесінде қонақүй бизнесі, қоғамдық тамақтану, көлік, сауда және басқа да қызмет көрсету салаларының дамуына серпін беріліп, жаңа жұмыс орындары ашылады. Сонымен қатар инвестиция көлемін арттырып, бюджет кірісін ұлғайтуға мүмкіндік береді.
