Өртті ауыздықтау жұмыстарына Төтенше жағдайлар министрлігінің авиациясы мен өрт сөндіру бөлімшелері, жергілікті атқарушы органдар және орман шаруашылығының мамандары жұмылдырылды. Құтқару операциясы шамамен сегіз сағатқа созылды.
Алматы облысы Төтенше жағдайлар департаменті баспасөз қызметінің маманы Ақтоты Аятқызының айтуынша, өртті сөндіру жұмыстары ауа райының қолайсыздығына байланысты күрделене түскен.
«Төтенше жағдайлар министрлігінің авиациясы өрт ошағына жалпы көлемі 51 тонна су төгіп, 17 рет әуеден су шашу жұмыстарын жүргізді. Өртті сөндіруге аптап ыстық пен секундына 4 метрге дейін жеткен солтүстік-батыс желі кедергі келтірді. Соған қарамастан, Төтенше жағдайлар министрлігі бөлімшелерінің, жергілікті атқарушы органдардың және орман шаруашылығы қызметкерлерінің үйлесімді іс-қимылының арқасында өрт толықтай сөндірілді», – деді Ақтоты Аятқызы.
Құтқарушылардың мәліметінше, өрт салдарынан зардап шеккендер жоқ. Сондай-ақ жақын маңдағы елді мекендерге қауіп төнбеген. Өрттің шығу себептері анықталып жатыр.
