Қазақстан Республикасы Төтенше жағдайлар министрлігінің мәліметінше, үш адамнан құралған туристік топ Антикайнен асуы арқылы шыңға көтерілген. Алайда маршрут барысында Ресей Федерациясының азаматы жарақат алып, өздігінен қозғалу мүмкіндігінен айырылған.
Туристерден көмек туралы хабар түскен бойда оқиға орнына Алматы қаласы Төтенше жағдайлар департаментінің Құтқару қызметінің мамандары жедел аттанды.
Іздестіру-құтқару жұмыстары барысында құтқарушылар зардап шеккен туристі тауып, оған алғашқы қажетті көмек көрсетті. Кейін арнайы жабдықтың көмегімен оны қиын әрі қауіпті таулы аумақтан қауіпсіз жерге түсірді.
Құтқару операциясы сәтті аяқталғаннан кейін жарақат алған турист одан әрі медициналық көмек көрсету үшін Апаттар медицинасы орталығының қызметкерлеріне тапсырылды.
Төтенше жағдайлар министрлігі тауға шығуды жоспарлаған азаматтарды қауіпсіздік талаптарын қатаң сақтауға шақырады. Мамандар ауа райын алдын ала зерделеп, маршрутты мұқият жоспарлауға, қажетті альпинистік жабдықтарды пайдалануға және төтенше жағдайда жедел байланысқа шығу мүмкіндігін қамтамасыз етуге кеңес береді.
