Синоптиктердің мәліметінше, алдағы күндері Қазақстан аумағында атмосфералық фронттардың әсерінен құбылмалы ауа райы сақталып, бірқатар өңірде нөсер жаңбыр, найзағай, бұршақ және қатты жел күтіледі. Сонымен қатар бірнеше аймақта ауа температурасы 41 градусқа дейін көтеріледі.
Мамандардың болжамынша, 7–9 шілде аралығында елдің батысында, шығысында және оңтүстік-шығысында жаңбыр жауып, найзағай ойнайды.
7–8 шілдеде жауын-шашын солтүстік және орталық өңірлерге де таралады. Әсіресе 7 шілдеде орталық пен шығыс облыстарында нөсер жаңбыр жауады деп күтілсе, 8 шілдеде батыс өңірлер мен оңтүстік-шығыстың таулы аймақтарында, ал 9 шілдеде еліміздің батысында қатты жауын-шашын болуы ықтимал.
Синоптиктер кей жерлерде желдің күшейіп, бұршақ жауу қаупі бар екенін ескертті. Әсіресе батыс, оңтүстік және шығыс өңірлерде желдің екпіні күшейеді.
Сонымен қатар алдағы күндері еліміздің бірқатар өңірінде аптап ыстықтың күшеюі болжанып отыр. Ауа температурасы солтүстік-батыс пен орталық өңірлерде 35–39 градусқа дейін көтерілсе, жекелеген аудандарда 41 градусқа дейін жетуі мүмкін. Солтүстік облыстарда да күн қатты ысып, термометр бағаны 35–38 градусты көрсетеді.
Ал республиканың қалған аумақтарында ауа температурасы айтарлықтай өзгермейді.
Метеорологтар тұрғындарды ауа райының күрт өзгеруіне байланысты сақтық шараларын сақтауға шақырады. Қатты ыстық кезінде күннің ең ыстық уақытында сыртта ұзақ болмауға, жеткілікті мөлшерде су ішуге кеңес береді. Ал нөсер жаңбыр, найзағай және қатты жел кезінде қауіпсіздік талаптарын сақтап, дауылды ескертулерді назардан тыс қалдырмау қажет.
