Қазіргі уақытта оқиға орнында қалпына келтіру және қауіпсіздікті қамтамасыз ету жұмыстары үздіксіз жүргізілуде.
Алматы облысы әкімдігінің мәліметінше, оқиға 2 шілде күні таңғы сағат 06:50 шамасында Қарасай ауданына қарасты Жаңатұрмыс ауылындағы «Ақсай карьері» ЖШС аумағында болған. Ақсай өзеніндегі су ағынының әсерінен жағалау шайылып, карьердің солтүстік-батыс бөлігіндегі топырақ массасы сырғыған.
Оқиға туралы хабар түскен бойда төтенше жағдай қызметтері мен жергілікті атқарушы органдар жедел түрде оқиға орнына жетіп, ахуалды бақылауға алды.
Қауіпсіздік мақсатында карьерге жақын орналасқан тоғыз жеке тұрғын үйдің тұрғындары уақытша эвакуацияланды. Мамандар аумақты толық тексеріп, қауіпті аймақты қоршауға алып, жағдайды тұрақтандыруға бағытталған кешенді жұмыстарды қолға алды.
Қазіргі уақытта инженерлік және қалпына келтіру жұмыстарына 19 маман мен 14 бірлік арнайы техника жұмылдырылған. Сонымен қатар тұрғындарға түсіндіру жұмыстары жүргізіліп, олардың қауіпсіздігін қамтамасыз ету бойынша барлық қажетті шаралар қабылдануда.
Қалыптасқан жағдайды ескере отырып, Қарасай ауданында жергілікті деңгейдегі төтенше жағдай режимі жарияланды. Бұл шешім апат салдарын жоюға қажетті күштер мен құралдарды жедел жұмылдырып, жұмыстарды тиімді үйлестіруге мүмкіндік береді.
Облыс әкімдігі Алматы облысының өзге аудандарында жағдай тұрақты екенін айтады. Ал жүргізіліп жатқан жұмыстар Алматы облысының әкімі мен жауапты мемлекеттік органдардың тұрақты бақылауында.
Мамандар тұрғындарды сабыр сақтауға, құзырлы органдардың талаптары мен ұсынымдарын орындауға және тек ресми ақпарат көздеріне ғана сенуге шақырады.
