Алкогольге тәуелділік – адам денсаулығына, отбасы берекесіне және қоғамның дамуына кері әсер ететін маңызды әлеуметтік мәселелердің бірі. Алкогольді шамадан тыс тұтыну адамның физикалық және психологиялық жағдайын нашарлатып қана қоймай, көптеген құқық бұзушылықтар мен тұрмыстық жанжалдардың туындауына себеп болады. Сондықтан алкоголизмнің алдын алу – қоғамның ортақ міндеті.
Мамандардың айтуынша, алкогольді тұрақты түрде пайдалану адамның жүйке жүйесіне, жүрек-қан тамырлары жүйесіне, бауырына және басқа да маңызды ағзаларына зиян келтіреді. Сонымен қатар алкогольге тәуелділік адамның еңбекке қабілеттілігін төмендетіп, өмір сүру сапасының нашарлауына әкеледі. Көп жағдайда бұл отбасылық кикілжіңдерге, ажырасуға, қаржылық қиындықтарға және әлеуметтік мәселелерге себеп болады.
Алкоголизмнің алдын алуда ең маңызды бағыттардың бірі – халықтың, әсіресе жастардың арасында түсіндіру жұмыстарын жүргізу. Жасөспірімдер мен жастар алкогольдің зияны туралы нақты ақпарат алып, оның денсаулыққа және болашақ өміріне тигізетін кері әсерін түсінуі қажет. Бұл бағытта білім беру ұйымдарында дәрістер, кездесулер, акциялар және басқа да профилактикалық іс-шаралар ұйымдастырылып келеді.
Салауатты өмір салтын қалыптастыру алкоголизмнің алдын алудың тиімді жолдарының бірі болып табылады. Спортпен шұғылдану, мәдени және шығармашылық үйірмелерге қатысу, белсенді демалыс түрлерімен айналысу адамның бос уақытын пайдалы өткізуіне мүмкіндік береді. Сондай-ақ дұрыс тамақтану мен денсаулыққа жауапкершілікпен қарау да зиянды әдеттердің алдын алуға көмектеседі.
Отбасының рөлі де ерекше маңызды. Балалардың тәрбиесіне көңіл бөлу, олардың ортасын бақылау, сенімді қарым-қатынас орнату және дұрыс үлгі көрсету – зиянды әдеттердің қалыптасуына жол бермейтін маңызды факторлар. Баланың тәрбиесі ең алдымен отбасынан басталатынын естен шығармаған жөн.
Алкогольді шамадан тыс тұтыну көбіне жол-көлік оқиғаларына, тұрмыстық зорлық-зомбылыққа, қоғамдық тәртіпті бұзу фактілеріне және басқа да құқық бұзушылықтарға әкеледі. Сондықтан алкоголь мәселесі тек денсаулық сақтау саласының ғана емес, бүкіл қоғамның назарында болуы тиіс.
Егер адам алкогольге тәуелділіктің белгілерін байқаса немесе жақындарының арасында осындай мәселе туындаса, уақытылы мамандардың көмегіне жүгіну маңызды. Ерте көрсетілген көмек тәуелділіктің асқынуына жол бермей, қалыпты өмірге оралу мүмкіндігін арттырады.
Дені сау ұлт – мемлекеттің басты байлығы. Сондықтан әрбір азамат өз денсаулығына жауапкершілікпен қарап, зиянды әдеттерден бас тартып, салауатты өмір салтын таңдауы қажет. Алкоголизмнің алдын алу – әр отбасының амандығы мен қоғамның тұрақты дамуына қосылған маңызды үлес. Салауатты өмір салтын таңдау – жарқын болашаққа бастар дұрыс қадам.
