Мемлекет басшысының айтуынша, өскелең ұрпақ Тәуелсіздік пен Егемендікті, елдің аумақтық тұтастығын, азаматтардың құқықтары мен бостандықтарын, сондай-ақ Әділ, Құқықтық және Озық Қазақстан құру идеясын терең түсініп, жүрекпен қабылдауы қажет.
«Алдымызда стратегиялық маңызды міндет тұр. Мемлекетіміздің басты құндылықтарын жете түсініп, жүрекпен қабылдайтын жастар тәрбиелеуіміз керек», – деді Президент.
Әскери қызмет патриотизм мектебіне айналуы тиіс
Қасым-Жомарт Тоқаев әскери қызметтің шынайы патриоттарды тәрбиелейтін маңызды институт болуы қажет екенін атап өтті.
Осыған байланысты Мемлекет басшысы әскери дәстүрлерді «Адал азамат – Сарбаз – Отан қорғаушы» қағидаты негізінде жаңғырту бастамасын қолдайтынын айтты.
Президенттің сөзінше, енді әскерге шақыру, әскери ант қабылдау және әскери қызметтен босату рәсімдері мемлекеттік хаттама талаптарына сәйкес жаңа форматта әрі салтанатты түрде ұйымдастырылады.
Бұл өзгерістер жастардың әскери қызметке деген көзқарасын қалыптастырып, әскери дәстүрлердің сабақтастығын нығайтуға және әскердің қоғамдағы беделін арттыруға ықпал етеді.
«Сарбаз болу – зор мәртебе. Қарулы күштер қатарында борышын өтеген әр азамат қоғамның құрметіне лайық. Барлығымыз күш біріктірсек, ата-аналар әскери мамандықты таңдаған ұл-қыздарын мақтан тұтатын деңгейге жетеміз деп сенемін», – деді Мемлекет басшысы.
Президент қазіргі әлемдегі геосаяси ахуалдың күрделене түскеніне назар аударды.
Оның айтуынша, әскери қақтығыстар мен санкциялық қысым күшейген кезеңде мемлекет қауіпсіздігі мен ұлттық бірліктің маңызы бұрынғыдан да арта түскен.
Сондықтан жастардың бойында мемлекеттік рәміздерге құрмет, азаматтық жауапкершілік және ел тағдырына бейжай қарамау қасиеттерін қалыптастыру маңызды.
Мемлекет басшысы мұндай құндылықтар жаңа буынның дүниетанымының өзегіне айналуы тиіс екенін атап өтті.
