Тиісті қаулыға 2026 жылғы 15 маусымда қол қойылған. Құжатта заңды тұлғалардың есірткі құралдарына, психотроптық заттар мен прекурсорларға деген қажеттілік көлемі айқындалған. Бұл заттарды пайдалану тек заңнамада көзделген медициналық, ғылыми-зерттеу, оқу және өндірістік мақсаттармен шектеледі.
Қаулыға сәйкес, есірткі құралдарының тізімі кеңейтілген. Бұған дейін 24 атаудан тұрған тізім енді 30 атауды қамтиды. Оның құрамына героин, кодеин, метадон, морфин, кокаин, барбитал және басқа да заттар енгізілген.
Сонымен қатар психотроптық заттардың тізімі де едәуір ұлғайған. Егер өткен жылы бұл санатта 51 атау болса, биыл олардың саны 87-ге жетті. Тізімге амфетамин, бупренорфин, диазепам, клоназепам, оксазепам, нозепам, фенобарбитал секілді медицина саласында қолданылатын препараттар енгізілген.
Ал прекурсорлар тізімінде 14 түрлі химиялық зат көрсетілген. Олардың қатарында сірке қышқылы ангидриді, ацетон, тұз қышқылы, күкірт қышқылы, толуол, эфедрин және басқа да химиялық қосылыстар бар. Биыл бұл тізім жаңа затпен толықтырылып, оған тетрагидрофуран енгізілді.
Мамандардың айтуынша, мұндай квоталар есірткі құралдары мен психотроптық заттардың заңды айналымын мемлекеттік бақылауда ұстауға, сондай-ақ денсаулық сақтау, ғылым және өнеркәсіп салаларының қажеттіліктерін қамтамасыз етуге мүмкіндік береді.
Құжат 2026 жылғы 15 маусымнан бастап күшіне енді.
