Инвестициялық келісімге Қазақстан Республикасының Ауыл шаруашылығы министрі Айдарбек Сапаров пен Иранның ірі азық-түлік холдингінің президенті Голам Али Сулеймани қол қойды.
Жоба Қазақстан мен Иран арасындағы сауда-экономикалық ынтымақтастықты дамыту бағытындағы маңызды қадамдардың бірі саналады. Сонымен қатар бұл келісім өткен жылдың желтоқсанында Иран Ислам Республикасы Президентінің Қазақстанға сапары барысында қол жеткізілген уағдаластықтардың жалғасы болып отыр.
Жылына 155 мың тонна өнім өндіріледі
Жоспар бойынша жаңа өндіріс орны Алматы облысында бой көтереді. Қазіргі уақытта құрылыс жүргізілетін аумақта құрылыс-монтаж жұмыстары басталған.
Жобаның жалпы құны 35,2 миллиард теңгені құрайды. Зауыт іске қосылғаннан кейін сүтті терең өңдеп, ірімшік пен басқа да сүт өнімдерін өндіретін еліміздегі ең ірі кәсіпорындардың біріне айналмақ.
Ауыл шаруашылығы министрі Айдарбек Сапаровтың айтуынша, агроөнеркәсіптік кешендегі өңдеу саласын дамыту мемлекеттік саясаттың басым бағыттарының бірі болып қала береді.
«Мемлекет басшысы агроөнеркәсіп кешенінде өңделген өнім үлесін арттыру және жоғары қосылған құны бар өндірістерді құру міндетін жүктеді. Сүт саласының әлеуеті өте жоғары. Өткен жылы елімізде ірімшік пен сүзбе өндірісі 13,1 пайызға өсті. Жаңа зауыттың іске қосылуы қайта өңдеу көлемін ұлғайтып қана қоймай, отандық сүт өндірушілер үшін тұрақты өткізу нарығын қалыптастырады», – деді министр.
400 жаңа жұмыс орны ашылады
Ирандық инвестор жобаны жүзеге асыру аясында 400 тұрақты жұмыс орнын құруды жоспарлап отыр. Сонымен қатар қазақстандық мамандарды оқыту және даярлау, заманауи технологияларды енгізу көзделген.
Голам Али Сулейманидің айтуынша, компания Қазақстанды ұзақ мерзімді стратегиялық серіктес ретінде қарастырады.
«Қазақстанның аграрлық әлеуеті жоғары, географиялық орналасуы тиімді және инвестициялық климаты қолайлы. Біз бұл елді тек жекелеген жобаларды іске асыратын алаң ретінде емес, сенімді стратегиялық әріптес ретінде бағалаймыз. Ірімшік зауытымен қатар картоп өңдеу және балалар тағамын өндіру бағытындағы жобаларды да қарастырып жатырмыз», – деді ол.
Зауыт 2029 жылы іске қосылады
Келісім аясында өндіріс орнына қажетті инженерлік инфрақұрылым жүргізіліп, инвесторға мемлекеттік қолдау шаралары ұсынылады.
Жоспар бойынша зауыттың құрылысы 2029 жылы аяқталып, пайдалануға беріледі.
Сондай-ақ компания 2028-2038 жылдар аралығында Алматы облысындағы жергілікті қауымдастықтарды қолдау және әлеуметтік жобаларды жүзеге асыру үшін жыл сайын 50 миллион теңге бөлуді жоспарлап отыр.
