Министрлік мәліметінше, Алматы облысында орналасқан ұлттық парк 127 мың гектардан астам аумақты алып жатыр. Ерекше қорғалатын табиғи аумақ 2004 жылы экологиялық, ғылыми, тарихи және эстетикалық маңызы жоғары табиғи кешендерді сақтау мақсатында құрылған.
Бүгінде парк ЮНЕСКО-ның Халықаралық биосфералық резерваттар желісіне енген. Бұл оның әлемдік деңгейдегі табиғи құндылық екенін көрсетеді.
Шарын ұлттық паркінің басты символдарының бірі – әйгілі Шарын шатқалы. Миллиондаған жылдар бойы жел мен судың әсерінен қалыптасқан алып қызыл жартастар табиғаттың ғажайып туындысына айналған. Сырт көзге ежелгі қамалдарды еске түсіретін шатқалдың биіктігі кей жерлерде 370 метрге дейін жетеді.
Мамандар Шарын шатқалы геологиялық ерекшелігі жағынан АҚШ-тағы әйгілі Үлкен каньонмен салыстырылады. Сондықтан бұл орын жыл сайын мыңдаған туристі өзіне тартатынын айтады.
Парк аумағындағы тағы бір ерекше табиғи нысан – Шарын ерен тоғайы. Бұл – мұз басу дәуірінен бері сақталып келе жатқан сирек табиғи ескерткіштердің бірі.
Өзен бойында табиғи жағдайда өсетін соғды ерені ағаштары ғасырлар бойы өзгеріссіз сақталып, бүгінгі күнге дейін жеткен. Жергілікті тұрғындар бұл ағашты «ерен» деп атайды. Әлемде өте сирек кездесетін бұл өсімдіктің табиғи таралған негізгі мекендерінің бірі дәл осы Шарын өңірі болып саналады.
Ұлттық парк аумағында сирек кездесетін өсімдіктер мен жануарлардың көптеген түрі мекендейді. Бұл өңір биологиялық алуантүрлілікті сақтау тұрғысынан да ерекше маңызға ие.
