ТЖМ мәліметінше, бүгін Алматы облысының 112 жедел қызметіне Қонаев қаласындағы Қапшағай су қоймасының акваториясында оқиға болғаны туралы хабарлама келіп түскен.
Алдын ала мәлімет бойынша, қатты желдің салдарынан ішінде үш ересек адам болған понтон-қайық жағадан алыстап кеткен. Оқиға орнына жедел түрде құтқару бөлімшелері жіберілді.
Құтқарушылар су бетінде дрейфте жүрген жүзу құралын тауып, оны жағаға дейін сүйреп жеткізген. Кейін қайықтағы адамдар қауіпсіз жерге эвакуацияланды.
Ведомство үш азаматтың барлығы аман-есен құтқарылып, медициналық көмекке мұқтаж болмағанын растады.
Осыған байланысты Төтенше жағдайлар министрлігі тұрғындарға су айдындарында қауіпсіздік талаптарын қатаң сақтауға кеңес береді. Мамандар қайықпен немесе басқа да жүзу құралдарымен суға шығар алдында ауа райы болжамын міндетті түрде ескеруге шақырды.
