Оқиға шаш бояу қызметінен кейін болған. Әйелдің айтуынша, шаштараз оның шашын өзі қалаған түске бояй алмаған, ал көрсетілген қызметтің сапасы күткен нәтижеге сай келмеген.
Мәселені өз бетінше шеше алмаған тұтынушы Алматы облысы бойынша тұтынушылардың құқықтарын қорғау департаментіне жүгінген.
Ведомство мәліметінше, салон мамандары клиенттің қалаған түсіне қол жеткізу үшін шашты екі рет бояуға тырысқан. Алайда көрсетілген қызметтің нәтижесі тұтынушының көңілінен шықпаған.
«Салонның шаштаразшылары әйелдің шашын өзі қалағандай түске бояу үшін бір емес, екі рет әрекеттенген. Бірақ әйелдің жұмыс сапасына көңілі толмай, департаментке жүгінген. Департамент салон әкімшілігімен сөйлесе келе, мәселені сотқа жеткізбей шешіп, әйелдің 40 мың теңгесін қайтартып берді», – делінген Сауда және тұтынушылардың құқықтарын қорғау департаменті таратқан хабарлдамада.
Нәтижесінде тараптар дауды сотқа дейінгі тәртіппен реттеп, клиентке қызмет үшін төленген 40 мың теңге толық көлемде қайтарылған.
Мамандар тұтынушылар көрсетілген қызмет сапасына көңілі толмаған жағдайда өз құқықтарын қорғауға құқылы екенін еске салды.
