Мемлекет басшысы жаңа қаланы дамытуға арналған құқықтық жүйе тұрақтылықты қамтамасыз етіп, инвестиция тартуға қолайлы жағдай жасауға тиіс екенін атап өтті.
«Түптеп келгенде, мұндай жұмыс жүйесі құқықтық тұрақтылықты сақтауға мүмкіндік береді және орынсыз заңнамалық өзгерістерден қорғап, жедел және тез шешімдер қабылдауға ықпал етеді», – деді Президент.
Қасым-Жомарт Тоқаевтың айтуынша, Alatau City жобасына қатысты реттеу актілерін әзірлеу кезінде халықаралық тәжірибені ескеру маңызды.
«Алатау жобасына қатысты реттеу актілерін әзірлеу барысында міндетті түрде осындай құқықтық жүйелерді құру ісінде мол тәжірибесі бар білікті шетелдік сарапшыларды тарту қажет», – деді Мемлекет басшысы.
Президенттің мәліметінше, қала әкімдігі негізгі нормативтік-құқықтық актілердің барлығын бір жыл ішінде қабылдауды жоспарлап отыр. Алайда бұл жұмыстарды созуға болмайды.
«Қаланы дамыту жөніндегі кеңес бұл істі мейлінше тез қолға алуы керек. Жұмысты соза беруге болмайды. Әйтпесе, инвестициядан құр қаламыз. Бизнес өкілдері де бізге сеніп отыр, сондықтан бұл жұмысқа нұқсан келтіруге болмайды», – деді Қасым-Жомарт Тоқаев.
Президент халықаралық инвесторлар ұзақ күтпейтінін және инвестициялық шешімдерді жылдам қабылдайтынын ескертті.
«Халықаралық инвесторлар қолайлы жағдай жасайды деп, жылдар бойы күтіп отырмайды. Олар қай жерде мол мүмкіндік болса, соған сай бірден шұғыл шешім қабылдайды», – деді ол.
Осыған байланысты Мемлекет басшысы Alatau City жобасының құқықтық базасын қалыптастыру стратегиялық маңызға ие міндет екенін айтты.
«Алатау жобасына қатысты заңнамалық жұмыс жылдам әрі сапалы жүргізілуге тиіс. Бұл – аса маңызды стратегиялық міндет», – деп түйіндеді Президент.
