Жаңа буындағы цифрлық технологияларға арналған форумға қордың Бас атқарушы директорының орынбасары Арман Тастанбеков қатысып, Alatau City жобасының даму стратегиясы жөнінде баяндама жасады.
Keynote-сессия барысында Alatau City физикалық инфрақұрылым мен цифрлық жүйелер қатар қалыптасатын жаңа буындағы қала ретінде таныстырылды. Жоба цифрлық активтерді дамытуға, инфрақұрылымды токенизациялауға, ашық инвестициялық тетіктерді енгізуге және Web3 технологияларын кеңінен пайдалануға негізделген.
Арман Тастанбековтің айтуынша, Alatau City дәстүрлі Smart City форматынан өзгеше бағытта дамып келеді.
«Alatau City – токенизация, жасанды интеллект, Web3 және цифрлық инвестициялық жүйелер қала дамуының іргетасына айналатын әлемдегі алғашқы жобалардың бірі», – деді ол.
Спикердің сөзінше, қала AI-native economy қағидаттарына сүйене отырып қалыптасуда. Бұл жасанды интеллект, цифрлық сәйкестендіру, блокчейн технологиялары мен автоматтандырылған сервистер қаланың басқару жүйесіне, инфрақұрылымына және экономикалық процестеріне бастапқы кезеңнен енгізілетінін білдіреді.
Жобаның басты ерекшеліктерінің бірі – «tokenization by default» қағидаты. Бұл тәсіл қала инфрақұрылымы мен сервистерін халықаралық инвестициялық орта мен жаңа цифрлық экономика талаптарына алдын ала бейімдеуді көздейді.
Жоба авторларының пікірінше, мұндай модель халықаралық инвесторлар, технологиялық компаниялар мен тұрғындар үшін ашық әрі қолжетімді экожүйе қалыптастыруға мүмкіндік береді.
Конференция аясында Alatau City аумағында өңірлік криптокластер құру бастамасы да таныстырылды. Жоспар бойынша кластер Web3-компанияларды, инвесторларды, жоғары оқу орындарын, өндірістік кәсіпорындарды және технологиялық акселераторларды бір алаңға біріктіреді.
Жобаны іске асыру нәтижесінде Alatau City цифрлық сервистерді, инновациялық инвестициялық өнімдерді және экономиканың нақты секторына арналған технологиялық шешімдерді дамыту орталығына айналуы мүмкін.
