Полиция мәліметінше, құқық бұзушылық Жедел басқару орталығының бейнебақылау камералары арқылы жүргізілген мониторинг барысында анықталған. Бақылау кезінде мемлекеттік тіркеу нөмірінде өзгеріс бар автокөлік күдік тудырған.
Тексеру нәтижесінде жүргізушінің құқық бұзушылықтарды автоматты түрде тіркейтін жүйеден жалтару мақсатында мемлекеттік нөмірдегі әріптердің бірін әдейі өзгерткені белгілі болды.
Құқық қорғау органдарының қабылдаған шараларының нәтижесінде жүргізуші анықталып, қолданыстағы заңнама талаптарына сәйкес әкімшілік жауапкершілікке тартылды. Сондай-ақ көлік арнайы айып тұрағына қойылған.
«Жүргізуші жол қозғалысы ережелерін тіркейтін автоматтандырылған жүйені алдау үшін мемлекеттік тіркеу нөміріне өзгеріс енгізген. Алайда бұл әрекет бейнебақылау камераларының көмегімен анықталды», – деп хабарлады Алматы облысы полиция департаментінің баспасөз қызметі.
Полиция өкілдері мемлекеттік тіркеу нөмірлерін жасыру, өзгерту немесе қолдан жасау заң бұзушылық болып саналатынын ескертті. Мұндай әрекеттер үшін заңнамада әкімшілік жауапкершілік қарастырылған.
