Жедел-профилактикалық іс-шараға бір автобус пен бірнеше қызметтік автокөлік тартылды. Кәмелетке толмағандар ісі жөніндегі полиция инспекторлары жастар жиі бас қосатын аулаларды, саябақтарды және ойын-сауық орындарын аралап, рейдтік бақылау жүргізді. Шара барысында қоғамдық тәртіптің сақталуы қадағаланып, жасөспірімдердің түнгі уақытта заңсыз жүру деректерінің алдын алуға басымдық берілді.
Мұндай рейдтер полиция қызметкерлері үшін қалыпты тәжірибеге айналған. Себебі олар кәмелетке толмағандардың түнгі уақытта жиі баратын орындары мен қозғалыс бағыттарын жақсы біледі. Тәжірибе көрсеткендей, жасөспірімдердің басым бөлігі түнгі мезгілде уақытын компьютерлік ойын клубтарында өткізеді.
Мәселен, кезекті рейд барысында «Асыл Арман» тұрғын үй кешеніндегі компьютерлік ойын клубтарының бірінен бірнеше кәмелетке толмаған жасөспірім анықталды. Олар учаскелік полиция пунктіне жеткізіліп, ата-аналары шақырылды. Заң талаптарына сәйкес ата-аналардан түсініктеме алынып, профилактикалық әңгіме жүргізіліп, ескерту берілді.
Полиция қызметкерлерінің айтуынша, мұндай жағдайларда ата-аналардың көпшілігі баласының дүкенге кеткенін немесе досының үйіне қонуға сұранғанын алға тартады. Алайда рейд нәтижелері жасөспірімдердің түнгі уақытын көбіне ойын-сауық орындарында өткізетінін көрсетіп отыр.
Жасөспірімдер тұрғын үй кешеніндегі учаскелік полиция пунктіне жеткізіліп, ата-аналары шақырылды. Оларға қатысты түсіндіру жұмыстары жүргізіліп, ата-аналардан түсініктеме алынды және заң талаптарына сәйкес ескерту жасалды.
Рейд қорытындысы бойынша ондаған компьютерлік клуб пен ойын-сауық мекемелерінде 12 әкімшілік құқықбұзушылық тіркелді. Олардың қатарында кәмелетке толмағандардың түнгі уақытта ойын-сауық орындарына жіберілуі және мекеме иелерінің заң талаптарын бұзуы секілді фактілер бар.
Ұйымдастырушылардың айтуынша, мұндай рейдтер бір реттік акция емес, жүйелі түрде жүргізілетін профилактикалық шаралардың бір бөлігі. Осыған байланысты түнгі ойын-сауық орындарына бақылау күшейтіліп, тексеру жұмыстары алдағы уақытта да тұрақты түрде жалғасады.
«Жастардың қауіпсіздігін қамтамасыз ету – біздің басты міндетіміздің бірі. Сондықтан жасөспірімдерді құқыққа қайшы әрекеттерге тартудың кез келген көрінісінің алдын алу бағытындағы жұмыстар жүйелі түрде жалғасады. Түнгі ойын-сауық орындарының барлығы заң талаптарын қатаң сақтауы тиіс. Әрбір анықталған құқықбұзушылық назардан тыс қалмайды және оған сәйкес тиісті шаралар қабылданады. Жыл басынан бері өңірде жүргізілген жедел-профилактикалық іс-шаралар нәтижесінде 3000-нан астам әкімшілік хаттама толтырылды. Бұл жұмыстар қылмыс деңгейінің төмендеуіне және құқықбұзушылықтардың азаюына оң ықпал етіп отыр.
Қазақстан Республикасының Әкімшілік құқық бұзушылық туралы кодексіне сәйкес, кәмелетке толмағандарға ата-анасының немесе заңды өкілдерінің еріп жүруінсіз сағат 23:00-ден 06:00-ге дейін ойын-сауық орындарында немесе тұрғын үйден тыс жерде жүруге тыйым салынады. Аталған талапты бұзған жағдайда ата-аналар әкімшілік жауапкершілікке тартылады», – деді Берік Дәкеев
Еске салайық, өңірде 14–16 мамыр аралығында өткен «Түнгі қаладағы балалар» жедел-профилактикалық іс-шарасы барысында 370 әкімшілік құқықбұзушылық анықталған болатын.
