Нысан «Көлсай көлдері» ұлттық паркінің аумағында, Көлсай көліне жақын маңда орналасқан. Тікұшақ алаңы төтенше жағдайлар кезінде авиациялық жұмыстарды жедел орындауға арналған.
Аталған нысан арқылы қажет болған жағдайда халықты эвакуациялау, авариялық-құтқару бөлімшелерін жеткізу, сондай-ақ арнайы техника мен қажетті жабдықтарды жетуі қиын аймақтарға жедел тасымалдау мүмкіндігі қарастырылған.
Нысанды аралау барысында ТЖМ басшысына тікұшақ алаңының техникалық мүмкіндіктері мен пайдалану шарттары таныстырылды. Мамандардың айтуынша, алаң әуе кемелерінің қауіпсіз қонуы мен ұшу талаптарына толық сәйкес келеді.
Сонымен қатар, бұл нысан өңірдің таулы әрі туристік аумақтарында жедел әрекет ету мүмкіндігін арттырып, төтенше жағдайлардың салдарын азайтуға ықпал етеді.
Айта кетейік, «Көлсай» тікұшақ алаңының құрылысы бюджеттен тыс қаражат есебінен жергілікті кәсіпкердің қолдауымен жүзеге асырылған.
