Алматы облыстық полиция департаментінің мәліметінше, биыл 20 қаңтарда кәмелетке толмаған жасөспірімнің ер адамға дене жарақатын салу фактісі бойынша қылмыстық іс қозғалған.
Алдын ала ақпаратқа сәйкес, 16 қаңтар күні шамамен сағат 09:00-де Шамалған ауылындағы орта мектептердің бірінде жасөспірім мен ер адам арасында жанжал туындаған. Соның салдарынан ер адам дене жарақатын алған.
«Арыз түскеннен кейін жасөспірім заңды өкілдерімен бірге дереу полиция бөліміне жеткізілді. Қазіргі уақытта аталған факті бойынша оқиғаның барлық мән-жайын жан-жақты, толық әрі объективті анықтауға бағытталған қажетті тергеу амалдары жүргізіліп жатыр. Тергеу қорытындысы бойынша қолданыстағы заңнамаға сәйкес процессуалдық шешім қабылданады», – деп хабарлады облыстық ПД өкілдері.
Сонымен қатар, іс сотта қаралғаннан кейін материалдар кәмелетке толмағандардың істері жөніндегі комиссияға жолданады. Онда мектеп оқушысын профилактикалық есепке қою мәселесі қаралады.
Полиция мәліметінше, сот жасөспірімнің ата-анасының әрекетіне де құқықтық баға береді.
