Енді бұл елдімекендерде су қысымы айтарлықтай көтеріліп, халықтың күнделікті тұрмысындағы ең өзекті түйткілдердің бірі жойылды.
Бұған дейін ауыл тұрғындары, әсіресе жаз мезгілінде, су тапшылығын қатты сезінетін. Күн ысыған уақытта бау-бақша суару, мал-жанға қарау және тұрмыстық қажеттіліктер артқан сайын орталық жүйедегі су қысымы күрт төмендеп, кей үйлерге су мүлде жетпей қалатын.
Қазіргі таңда аталған екі ауылда 437 абонент тіркелген. Бұған дейін елдімекендер тек 300 текше метрлік резервуар арқылы сумен қамтылып келген. Алайда тұтыну көлемінің артуына байланысты бұл қуат жеткіліксіз болды. Осыған байланысты қосымша 25 текше метрлік су мұнаралары орнатылып, жүйеге қосылды.
Мамандардың айтуынша, су мұнарасы – су жүйесіндегі қысымды тұрақты ұстап тұратын маңызды инженерлік нысан. Биікте орналасқандықтан, жиналған су табиғи қысыммен төменге таралып, тек орталық көшелерге ғана емес, шеткі үйлерге дейін бірқалыпты жетеді.
Жаңартылған жүйенің нәтижесін тұрғындар да бірден байқаған.
«Су мұнарасы іске қосылғанына үш күннен асты. Қазірдің өзінде айырмашылық анық сезіледі. Бұрын кей уақытта су жіңішкеріп, кейде мүлде тоқтап қалатын. Қазір қысым әлдеқайда жақсы. Енді алаңсыз көкөніс егіп, жеміс-жидек суарып, күнделікті тірлігімізді жасайтын болдық», – дейді Сарыбұлақ ауылының тұрғыны Қуаныш.
Шеңгелді ауылдық округі әкімінің орынбасары Жандос Манеевтің айтуынша, бұл мәселе ұзақ уақыт бақылауда болып, тұрғындардың өтініші негізінде шешімін тапқан.
«Мұнымен жұмыс тоқтамайды. Қонаев қаласының кешенді даму жоспарына сәйкес, алдағы уақытта Кербұлақ, Сарыбұлақ, Шеңгелді және Ақөзек елдімекендеріндегі су құбырлары толық жаңартылады. Жобалық-сметалық құжаттары дайындалып, мемлекеттік сараптаманың оң қорытындысы алынған», – деді ол.
Айта кетейік, соңғы жылдары Шеңгелді ауылдық округінде инфрақұрылымды жаңғырту жұмыстары кезең-кезеңімен жүргізіліп келеді. Былтыр бес ауылға жаңа жол төселсе, биыл ауыз суға қатысты түйткіл шешімін тапты.
