Кино тарихында «Қыз Жібек» фильмі түсірілген көркем мекен бүгінде демалушылар жиі баратын орынға айналған. Қазіргі таңда мұнда күн сайын 1500–2000-ға дейін турист келеді.
Осыған байланысты «Таза Қазақстан» экологиялық акциясы аясында Алматы облысының әкімі Марат Сұлтанғазиев Күрті жағалауында жергілікті тұрғындармен бірге сенбілікке қатысты.
Өңір басшысы экологиялық мәдениетті қалыптастырудың маңызын атап өтті.
«Табиғат – бұл тек ресурс емес, бұл – біздің болашағымыз. Таза орта – әр азаматтың жеке жауапкершілігі. Бүгінгі бастама – тек бір күндік шара емес, ол тұрақты дағдыға айналуы тиіс», – деді әкім.
Аталған туристік аймақта өткен сенбілікке 500-ге жуық тұрғын қатысып, 9 арнайы техника жұмылдырылды. Нәтижесінде 5 тоннаға жуық қоқыс шығарылды.
Жалпы, Іле ауданында сенбілік кең көлемде ұйымдастырылып, негізгі туристік нысандар толық қамтылды. Атап айтқанда, Первомайские пруды, Sokol спорттық-техникалық кешені, Рыбацкая усадьба, Tortuga демалыс базасы және Dubai Resort аквапаркі аумақтарында тазалық жұмыстары жүргізілді.
Аудан бойынша сенбілікке 800-ден астам адам қатысып, 45 тонна тұрмыстық қалдық шығарылды.
Айта кетейік, бұл жұмыстар Қазақстан Республикасы Үкіметінің 2024 жылғы 31 қазандағы №910 қаулысымен бекітілген «2024–2029 жылдарға арналған “Таза Қазақстан” экологиялық мәдениетті дамыту тұжырымдамасы» аясында жүйелі түрде жүзеге асырылып келеді.
Жыл басынан бері Іле ауданында 8 санитарлық сенбілік және «Таза өлке – таза жер» акциясы ұйымдастырылды. Нәтижесінде 15 142 адам қамтылып, 189 арнайы техника жұмылдырылып, 795,4 тонна қоқыс шығарылған. Сонымен қатар 25 763 ағаш отырғызылды.
Мамандардың айтуынша, Іле ауданы бүгінде өндіріс пен инфрақұрылым ғана емес, экологиялық мәдениет қалыптасып жатқан өңір ретінде ерекшеленіп отыр. Ал Күрті жағалауы – табиғат пен туризм үйлескен жаңа тартымды нүктеге айналған.
