Ақпаратқа сәйкес, туристік нысандарда, саябақтар мен аулаларда жаппай сенбіліктер ұйымдастырылып жатыр. Бұл демалыс күндері облысқа еліміздің түрлі өңірлерінен және шетелден келетін қонақтар санының артуымен байланысты. Осыған орай туристік орындардың санитарлық талаптарға сай болуы ерекше маңызға ие.
Бүгінгі тазалық шаралары Іле өзені жағалауындағы «Тамғалы тас» шатқалында өтті. Аталған аумақта алдағы уақытта халықаралық «TENGRI ULTRA – 2026» марафоны ұйымдастырылмақ.
Биылғы жарысқа әлемнің 22 елінен 2000-ға жуық спортшы қатысып, 5000-нан астам жанкүйер келеді деп күтілуде. Дәстүрлі дода биыл 11-ші рет өткізілмек.
Алматы облысының әкімі Марат Сұлтанғазиев халықаралық жарыс өтетін аумаққа арнайы барып, дайындық барысымен танысты. Өңір басшысы марафон өтетін аумақтың таза, ұқыпты әрі қауіпсіз болуы керектігін атап өтті.
«Туристік орындардың тазалығы – елдің имиджі мен мәдениетінің айқын көрінісі. Әрбір қонақ табиғаттың сұлулығымен қатар, оның қаншалықты күтіп ұсталғанына мән береді. Таза әрі ұқыпты орта туристерге жағымды әсер қалдырып, олардың қайта келуіне ықпал етеді. Сондықтан аймақ тазалығын сақтау – әрбір азаматтың міндеті», – деді Марат Сұлтанғазиев.
Айта кетейік, биыл өңірде «Таза Қазақстан» акциясы аясында 220 мың ағаш отырғызу жоспарланған. Жыл басынан бері 77 мың көшет егілді.
Сонымен қатар, көктем басталғалы облыс аумағында 8 ірі сенбілік ұйымдастырылып, нәтижесінде 4 мың тоннадан астам қоқыс шығарылған.
Қазіргі уақытта қарағаш тұқымын жинау жұмыстары да қарқынды жүргізілуде. Бұл іске 150-ге жуық адам жұмылдырылып, нәтижесінде 400 келі тұқым жиналған. Жиналған дәндер алдағы уақытта көшет өсіру және елді мекендерді көгалдандыру жұмыстарына пайдаланылмақ.
