Оқиға Қарасай ауданына қарасты Іргелі ауылында болған. Мәліметке сәйкес, құрылыс базары аумағындағы құрылыс материалдары сатылатын бір қабатты және екі қабатты ғимараттардан өрт шыққан.
Өрт сөндірушілер жеткен кезде ашық жалын байқалып, оттың жақын маңдағы нысандарға таралу қаупі туындаған.
Құтқарушылардың жедел әрекетінің арқасында өрт оқшауланып, толықтай сөндірілді. Мамандар тілсіз жаудың өзге нысандарға таралуына жол бермеген.
ТЖД мәліметінше, өрттің жалпы аумағы 248 шаршы метрді құрады.
Алдын ала ақпарат бойынша, зардап шеккендер жоқ. Қазір өрттің шығу себептері анықталып жатыр.
