Төтенше жағдайлар министрлігінің мәліметінше, 112 пультіне Талғар ауданына қарасты Қайнар ауылындағы төрт қабатты тұрғын үйдің бірінші қабатында орналасқан екі бөлмелі пәтерден өрт шыққаны туралы хабарлама түскен.
Оқиға орнына жедел жеткен өрт сөндірушілер жалынды оқшаулап, қауіптің ұлғаюына жол бермеді. Өртті сөндіру барысында құтқарушылар пәтерден 5 газ баллонын — төрт 50 литрлік және бір 27 литрлік баллонды қауіпсіз жерге шығарып, жарылыс қаупін сейілтті.
Сондай-ақ мамандар өрттің көршілес пәтерлерге таралуына жол бермеген.
Алдын ала мәлімет бойынша, зардап шеккендер жоқ. Өрттің шығу себебі анықталып жатыр.
Құтқарушылар тұрғындарды газ құралдарын пайдалану кезінде қауіпсіздік талаптарын қатаң сақтауға шақырды.
